എറണാകുളം: പിറവത്ത് കെട്ടിട നിർമ്മാണത്തിനിടെ മണ്ണിടിഞ്ഞു വീണു മൂന്നു പേർക്ക് ദാരുണാന്ത്യം. ബുധനാഴ്ച വൈകിട്ട് അഞ്ചു മണിയോടെയാണ് നാടിനെ നടുക്കിയ ഈ സംഭവം ഉണ്ടായത്. ഇതര സംസ്ഥാന തൊഴിലാളികളാണ് മരിച്ചത്.

പശ്ചിമ ബംഗാൾ സ്വദേശികളായ സുബ്രതോ, സുകുമാർ, ഗൗർ എന്നിവരാണ് മരിച്ചത്. പിറവത്തെ പേപ്പതി എന്ന സ്ഥലത്തുള്ള സ്വകാര്യ വ്യക്തിയുടെ ഭൂമിയിൽ കെട്ടിട നിർമ്മാണത്തിനായി മണ്ണ് നീക്കവെയാണ് അപകടം ഉണ്ടായത്. അപകടം ഉണ്ടായ ഉടൻ അഗ്നിശമന സേനയും പോലീസും എത്തി ഇവരെ പുറത്തെടുത്തു സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.

റോഡിനോട് ചേർന്ന് ഉയരത്തിലുള്ള മൺതിട്ടയോട് ചേർന്ന് കോൺക്രീറ്റ് മതി കെട്ടി ഉയർത്തവെയാണ് മണ്ണിടിഞ്ഞത്. സംഭവത്തെ കുറിച്ച് അന്വേഷിക്കാൻ ജില്ലാ ലേബർ ഓഫീസറെ ചുമതലപ്പെടുത്തി മന്ത്രി ശിവൻ കുട്ടി ഉത്തരവിട്ടിട്ടുണ്ട്.