കോഴിക്കോട്ട് ഏറെ തിരക്കേറിയ മിഠായിത്തെരുവിൽ വൻ തീപിടിത്തം. രാധാ തിയേറ്ററിനു സമീപത്തെ മോഡേൻ ഹാൻഡ്​ലൂം ആൻറ്​ ടെക്​സ്​റ്റൈൽസ്​ എന്ന തുണിക്കടയിലാണ്​ ആദ്യം തീപിടിച്ചത്​. മൂന്നുനില കെട്ടിടത്തിൽ പ്രവർത്തിക്കുന്ന ഈ കട പൂർണമായും കത്തി നശിച്ചു. ആളപായം ഒന്നും ഇതുവരെയും റിപ്പോര്‍ട്ട് ചെയ്തിട്ടില്ല.

ഏഴ് അഗ്നിശമനസേനയുടെ യൂണിറ്റുകൾ തീയണയ്ക്കാൻ ശ്രമിക്കുകയാണ്. സ്ഥിതി ഇതുവരെയും നിയന്ത്രണ വിധേയമായിട്ടില്ല. അടുത്ത കടകളിലേക്കും തീപടർന്നു പിടിക്കാന്‍ തുടങ്ങിയതായാണ് വിവരം. രാവിലെ 11.30ഒാടെയാണ്​ തീപിടിത്തമുണ്ടായത്​. ഷോർട്ട്​ സർക്യൂട്ടാവാം​ അപകട കാരണ​മെന്നാണ്​ പ്രാഥമിക നിഗമനം. സംഭവസ്ഥലത്ത് കനത്ത പുകയാണുള്ളത്. അതുകൊണ്ടുതന്നെ രക്ഷാപ്രവര്‍ത്തനത്തിനും ബുദ്ധിമുട്ടേറുകയാണ്.