ഇറച്ചിക്കോഴി വില 200 എത്തിയേക്കും ! താളംതെറ്റി അടുക്കള ബജറ്റ്
സാധാരണക്കാരന്റെ അടുക്കള ബജറ്റിനെ താളംതെറ്റിച്ച് ഇറച്ചിക്കോഴി വില. സംസ്ഥാനത്ത് പലയിടത്തും ഒരു കിലോ ഇറച്ചിക്കോഴിക്ക് 160 നും 170 നും ഇടയില് വിലയായി. വില ഇനിയും കുതിച്ചുയരുമെന്നാണ് വിപണി സൂചനകളില് നിന്ന് വ്യക്തമാകുന്നത്. ഇറച്ചിക്കോഴി കിലോയ്ക്ക് 200 രൂപ വരെ എത്താനും സാധ്യതയുണ്ട്. കനത്ത ചൂടും കോഴിത്തീറ്റയുടേയും കോഴിക്കുഞ്ഞുങ്ങളുടേയും വില വര്ധിച്ചതുമാണ് ഇറച്ചിക്കോഴി വില വര്ധിക്കാന് കാരണം.
സാധാരണ മാര്ച്ച് മാസത്തില് കോഴി വില കുറയുന്നതാണ് പതിവ്. മുന് വര്ഷങ്ങളില് ഈ സമയത്ത് 90 രൂപയായിരുന്നു കോഴിയിറച്ചിക്ക്. രണ്ട് മാസം മുന്പ് വരെ 98 രൂപയില് നിന്നിരുന്ന വിലയാണ് ഇന്ന് 164 ലേക്ക് എത്തിയത്.
കോഴിയിറച്ചി വില വര്ധിച്ചതോടെ വില്പനയിലും ഇടിവ് രേഖപ്പെടുത്തിയതായി കച്ചവടക്കാര് പറയുന്നു. ചൂട് കൂടിയതോടെ ഇറച്ചിക്കോഴി ഉല്പാദനം കുറഞ്ഞതാണ് വില ഉയരാന് പ്രധാന കാരണം. കനത്ത ചൂടില് കോഴികള് ചാവുന്നത് കാരണം സംസ്ഥാനത്തെ ഫാമുകളില് പലതും കോഴി വളര്ത്തുന്നതില് നിന്ന് പിന്വാങ്ങിയിട്ടുണ്ട്.
കോഴിത്തീറ്റയ്ക്കു കഴിഞ്ഞ 2 മാസത്തിനിടയില് 300 രൂപയാണു ചാക്കൊന്നിന് വര്ധിച്ചത്. ശരാശരി 1400-1500 രൂപയുണ്ടായിരുന്ന കോഴിത്തീറ്റയ്ക്കു ഇപ്പോള് 2460 രൂപയായി ഉയര്ന്നു. അതോടൊപ്പം കോഴിക്കുഞ്ഞുങ്ങള്ക്കും വില രണ്ടിരട്ടിയിലേറെ കൂടി. 12-15 രൂപയുണ്ടായിരുന്ന കോഴിക്കുഞ്ഞുങ്ങള്ക്ക് 42 രൂപയായി. വില കൂടിയതോടെ കടകളിലും തിരക്കൊഴിഞ്ഞു.
