വരുന്ന നിയമസഭാ തിരഞ്ഞെടുപ്പില്‍ പി സി ജോർജിനെ പൂഞ്ഞാറിൽ പിന്തുണയ്ക്കുന്ന കാര്യത്തിൽ ഇടതുമുന്നണി തീരുമാനമൊന്നും എടുത്തിട്ടില്ലെന്ന് സി പി എം സംസ്ഥാന സെക്രട്ടറി കോടിയേരി ബാലകൃഷ്ണൻ. നിലവില്‍ പി സി ജോര്‍ജ് ഇടതു മുന്നണിയുടെ ഭാഗമല്ല. മുന്നണിയുമായി സഹകരിക്കാന്‍ താല്‍‌പര്യം അറിയിച്ചവര്‍ക്കൊക്കെ സീറ്റ് നല്‍കണമെന്നില്ല. ഘടക കക്ഷികളുടെ സീറ്റ് തീരുമാനിച്ച ശേഷമേ പിന്തുണയ്ക്കുന്ന മറ്റുള്ളവരുടെ കാര്യം തീരുമാനിക്കൂവെന്നും കോടിയേരി പറഞ്ഞു.

സീറ്റ് നല്‍കുന്ന കാര്യം ഒരാള്‍ മാത്രം തീരുമാനിക്കേണ്ട കാര്യമല്ല. മുന്നണി ഒരുമിച്ചെടുക്കേണ്ട തീരുമാനമാണ് ഇതെന്നും കോടിയേരി വ്യക്തമാക്കി.

അതേസമയം പൂഞ്ഞാറിൽ സ്ഥാനാർഥിയാക്കാമെന്ന് കോടിയേരി ബാലകൃഷ്ണൻ ഉറപ്പു നൽകിയിരുന്നതായി പി സി ജോർജ് നേരത്തെ പറഞ്ഞിരുന്നു. കോടിയേരിയുമായും ജില്ലാ സെക്രട്ടറി വി എൻ വാസവനുമായും സംസാരിച്ചിരുന്നു. സി പി എം തന്നെ ചതിക്കില്ലെന്നാണ് വിശ്വാസമെന്നും ജോര്‍ജ് പറഞ്ഞിരുന്നു.