പത്തനംതിട്ടയിലെ ജ്വല്ലറിയില്‍ നിന്ന് മാല മോഷ്ടിച്ച കള്ളനെ സിസി ടിവി ക്യാമറ കുടുക്കി. അറേബ്യന്‍ ജുവലേഴ്സില്‍ നിന്ന് കള്ളന് മാല മോഷ്ടിക്കുന്ന ദൃശ്യങ്ങളാണ് ക്യാമറയില്‍ വ്യക്തമായി പതിഞ്ഞത്. ഇയാളെ പിടികൂടാനുള്ള ശ്രമത്തിലാണ് പൊലീസ്.
സ്വര്‍ണകടയില്‍ ആള്‍ത്തിരക്കുള്ള നേരത്തായിരുന്നു മോഷണം നടന്നത്. പകല്‍ നേരത്ത് കടയിലെത്തിയ കള്ളന് വെള്ള മുണ്ടും ഷര്‍ട്ടുമാണ് ധരിച്ചിരുന്നത്. കണ്ടാല്‍ ആരും തെറ്റിദ്ധരിക്കില്ല. കസേരയില്‍ ഇരുന്ന ഇയാള്‍ ചുറ്റും നോക്കി, ആരും ശ്രദ്ധിക്കുന്നില്ലെന്ന് ഉറപ്പുവരുത്തിയ ശേഷം പതുക്കെ എഴുന്നേറ്റു. തുടര്‍ന്ന് കടയില്‍ തൂക്കിയിട്ടിരിക്കുന്ന വലിയ മാലകളിലൊന്ന് കൈക്കലാക്കി.
ഒന്നും സംഭവിക്കാത്ത പോലെ കസേരയില്‍ ഇരുന്ന ഇയാള്‍ മാല ഷര്‍ട്ടിന്റെ പോക്കറ്റിലിട്ടു. പോക്കറ്റില്‍ നിന്ന് മൊബൈല്‍ ഫോണ്‍ എടുത്ത് സംസാരിക്കുന്നതായും ദൃശ്യങ്ങളില്‍ കാണാം.
