കൊച്ചിയിലെ അമൃത ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിലെ നഴ്സ് മാനഭംഗത്തിനിരയായെന്ന പ്രചാരണത്തിന്റെ നിജസ്ഥിതി അറിയാനായി പൊലീസ് സംഘം ആശുപത്രിയിലെ സി സി ടി വി ദൃശ്യങ്ങൾ ശേഖരിച്ചു. അത്യാഹിത വിഭാഗത്തിന്റേതടക്കം 10 ദിവസത്തെ സി സി ടി വി ദൃശ്യങ്ങളാണ് ശേഖരിച്ചത്.

അന്വേഷണത്തിന് നേതൃത്വം കൊടുക്കുന്ന സ്പെഷൽ ബ്രാഞ്ച് അസിസ്റ്റന്റ് കമ്മിഷണറുടെ നേതൃത്വത്തിലുള്ള പൊലീസ് സംഘമാണ് ആശുപത്രിയിലെത്തി വിവരങ്ങൾ ശേഖരിച്ചത്. ദൃശ്യങ്ങള്‍ ശേഖരിച്ചതിന് പുറമേ ആശുപത്രിയിലെയും ഐ സി യുവിലെയും പ്രധാന റജിസ്റ്ററുകളും പരിശോധിച്ചു. ഐ സി യുവിൽ കഴിഞ്ഞിരുന്ന രോഗികളുടെ വിശദാംശങ്ങളും പൊലീസ് ശേഖരിച്ചിട്ടുണ്ട്. അന്വേഷണത്തോട് അമൃത ആശുപത്രിയും പൂർണമായി സഹകരിക്കുന്നുണ്ട്.

അതേസമയം, ആശുപത്രിക്കെതിരെ സമൂഹ മാധ്യമങ്ങളിൽ പ്രചാരണം നടത്തിയ ‘പോരാളി ഷാജി’ എന്ന ഫേസ്ബുക്ക് പേജിന്റെ ഉടമയാരെന്നറിയാൻ പൊലീസ് ഫേസ്ബുക്കിനെ സമീപിച്ചു.