ഘാനയില്‍ ഇന്ധന ടാങ്ക് പൊട്ടിത്തെറിച്ച് ഏഴ് മരണം. നിരവധി പേര്‍ക്ക് ഗുരുതരമായി പൊള്ളലേറ്റു. മൂന്നു പേര്‍ സംഭവസ്ഥലത്തുവച്ചും നാലു പേര്‍ ആശുപത്രിയില്‍വച്ചുമാണ്‌ മരിച്ചത്‌. ഘാനയിലെ തുറമുഖ നഗരമായ തകറാഡിയിലെ ആക്സിം പട്ടണത്തിലാണ് സംഭവം.
പെട്രോള്‍ ബങ്കിലെ ഇന്ധന ടാങ്ക് പൊട്ടിത്തെറിച്ചാണ്‌ ദുരന്തം ഉണ്ടായത്. ഇന്ധന ടാങ്കില്‍ പെട്രോള്‍ നിറയ്ക്കുന്നതിനിടെയാണ്‌ സ്ഫോടനമുണ്ടായത്. പൊള്ളലേറ്റവരില്‍ നിരവധി പേരുടെ നില അതീവ ഗുരുതരാവസ്ഥയിലാണെന്ന് റിപ്പോര്‍ട്ടുണ്ട്.
മരണസംഖ്യ ഉയരാന്‍ സാധ്യതയുണ്ടെന്ന്‌ ആശുപത്രിവൃത്തങ്ങള്‍ സൂചിപ്പിച്ചു. സംഭവത്തേക്കുറിച്ച്‌ അന്വേഷണം നടത്തുമെന്ന്‌ പൊലീസ് വ്യക്തമാക്കി. സംഭവത്തിന് പിന്നില്‍ അട്ടിമറി സാധ്യത ഉണ്ടാകാന്‍ സാധ്യതയില്ലെന്നാണ് പൊലീസ് നല്‍കുന്ന വിവരം.
