ലോകത്തെമ്പാടുമുള്ള ശാസ്ത്രകുതുകികളില്‍ കൌതകം ഉണ്ടാക്കിയതും അതേസമയം ചുരുളഴിയാത്ത രഹസ്യമായി നിലനിന്നിരുന്നതുമാണ് സാഹചര്യങ്ങള്‍ക്കനുസരിച്ച് നിറം മാറാനുള്ള ഓന്തിന്റെ സവിശേഷത. എന്നാല്‍ ഇപ്പോളിതാ കാലങ്ങള്‍ക്ക് ശേഷം ജന്തു ശാസ്ത്രജ്ഞര്‍ ആ രഹസ്യത്തിന്റെ ചുരുളഴിച്ചിരിക്കുകയാണ്. അതില്‍ ഇന്ത്യാക്കാരെ സംബന്ധിച്ച് വളരെ അഭിമാനാര്‍ഹമായ സംഗതിയുണ്ട്. എന്താണെന്നൊ, രാജ്യത്തിന്റെ അഭിമാനമായ ഭൌതിക ശാസ്ത്രജ്ഞനായ സിവി രാമന്റെ തിയറിയെ ആസ്പദമാക്കി പ്രവര്‍ത്തിക്കുന്ന ‘രാമന്‍ സ്പെട്രോസ്കോപ്പ്‘ എന്ന ഉപകരണം ഉപയോഗിച്ചാണ് ഈ രഹസ്യത്തെ ഗവേഷകര്‍ അനാവരണം ചെയ്തത്.

ജനീവ സര്‍വകലാശാലാ ഗവേഷകരാണ് കണ്ടെത്തലിന് പിന്നില്‍. ഓന്തിന്റെ തൊലിയിലുള്ള സൂക്ഷ്മപരലുകളുടെ പ്രത്യേകതയാണ് അവയ്ക്ക് വര്‍ണവൈവിധ്യം നല്‍കുന്നതെന്നാണ് കണ്ടെത്തല്‍. ഈ പരലുകള്‍ തമ്മിലുള്ള വിന്യാസമനുസരിച്ച് ഓന്തിന്റെ ശരീരത്തില്‍ തട്ടി പ്രതിഫലിക്കുന്ന പ്രകാശത്തിന്റെ തരംഗ ദൈര്‍ഘ്യം മാറിക്കൊണ്ടിരിക്കും. ഇതാണ് ഓന്തിന്റെ നിറം‌മാറ്റത്തിനു കാരണം. തന്മൂലം പച്ചതൊട്ട് ചുവപ്പുവരെയുള്ള നിറങ്ങള്‍ ഓന്തിന് ലഭിക്കും.

മഡഗാസ്‌കറില്‍ കാണുന്ന പാന്തര്‍ ഓന്തില്‍ ( Furcifer pardalis ) വര്‍ഷങ്ങളായി നടത്തിയ ഗവേഷണമാണ് പുതിയ കണ്ടെത്തലിലേക്ക് നയിച്ചത്. ശക്തമായ നിറംമാറ്റം പ്രകടിപ്പിക്കുന്ന ജീവിയാണ് പാന്തര്‍ ഓന്തുകള്‍. തൊലിയിലെ ക്രിസ്റ്റലുകളുടെ ക്രമീകരണം നിമിഷങ്ങള്‍ക്കകം വ്യത്യാസപ്പെടുത്തി നിറം മാറാന്‍ ഓന്തുകള്‍ക്ക് കഴിയുമെന്ന് ഗവേഷണത്തിന് നേതൃത്വം നല്‍കിയ പ്രൊഫസര്‍ മൈക്കല്‍ മിലിന്‍കൊവിച്ച് ചൂണ്ടിക്കാട്ടി.