അനുബന്ധ വാര്ത്തകള്
- ഉറക്കമില്ലാത്ത രാത്രികള്,വെളുപ്പിന് മൂന്നര മണിക്കും കുട്ടികളെ കളിപ്പിക്കേണ്ട അവസ്ഥ, ചിത്രങ്ങളുമായി വിഘ്നേശ് ശിവന്
- കേരള തീരത്ത് കടലാക്രമണത്തിനും ഉയര്ന്ന തിരമാലയ്ക്കും സാധ്യത; മത്സ്യത്തൊഴിലാളികള്ക്ക് ജാഗ്രതാ നിര്ദേശം
- ആലപ്പുഴ വനിതാ-ശിശു ആശുപത്രിയില് പ്രസവത്തെ തുടര്ന്ന് യുവതി മരിച്ചു; ചികിത്സ പിഴവെന്ന് ബന്ധുക്കള്
- കാനഡയിലെ ഇന്ത്യന് എംബസിക്ക് മുന്നില് ഖാലിസ്ഥാന് സംഘടനകളുടെ പ്രതിഷേധം; പതാക കത്തിച്ചു
- ദഹനം മെച്ചപ്പെടുത്താനുള്ള ഏഴുവഴികള് ഇതാണ്
സെറ്റ് പരീക്ഷയ്ക്ക് അപേക്ഷിക്കാനുള്ള അവസാന തിയതിക്ക് ദിവസങ്ങള് മാത്രം; നിബന്ധനകള് ഇവയൊക്കെ
ഹയര് സെക്കണ്ടറി, നോണ് വൊക്കേഷണല് ഹയര്സെക്കണ്ടറി അധ്യാപക നിയമനത്തിന് കേരള സര്ക്കാര് ഏര്പ്പെടുത്തിയിരിക്കുന്ന സംസ്ഥാനതല യോഗ്യതാ നിര്ണ്ണയ പരീക്ഷയായ സെറ്റ് (സ്റ്റേറ്റ് എലിജിബിലിറ്റി ടെസ്റ്റ്) നുള്ള ഓണ്ലൈന് രജിസ്ട്രേഷന് ഒക്ടോബര് 25 വരെ. എല്.ബി.എസ്. സെന്റര് ഫോര് സയന്സ് ആന്ഡ് ടെക്നോളജിയെയാണ് പരീക്ഷാ നടത്തിപ്പിനു ചുമതലപ്പെടുത്തിയിരിക്കുന്നത്. സെറ്റ് ജനുവരി 2024-ന്റെ പ്രോസ്പെക്ടസും, സിലബസും എല് ബി എസ് സെന്ററിന്റെ വെബ് സൈറ്റില് ലഭിക്കും.
ബിരുദാനന്തര ബിരുദ പരീക്ഷയില് 50% ത്തില് കുറയാതെ മാര്ക്ക് അല്ലെങ്കില് തത്തുല്യ ഗ്രേഡും, ബി.എഡ്-ഉം ആണ് അടിസ്ഥാന യോഗ്യത. ചില പ്രത്യേക വിഷയങ്ങളില് ബിരുദാനന്തര ബിരുദമുള്ളവരെ ബി.എഡ്. വേണമെന്ന നിബന്ധനയില് നിന്നും ഒഴിവാക്കിയിട്ടുണ്ട്. LTTC, DLED തുടങ്ങിയ ട്രെയിനിംഗ് കോഴ്സുകള് വിജയിച്ചവരെ സെറ്റിന് പരിഗണിക്കുന്നതാണ്.എസ്.സി./എസ്.ടി. വിഭാഗത്തില്പ്പെടുന്നവര്ക്കും പി.ഡബ്ലിയു.ഡി. വിഭാഗത്തില്പ്പെടുന്നവര്ക്കും ബിരുദാനന്തര ബിരുദത്തിന് 5% മാര്ക്കിളവ് അനുവദിച്ചിട്ടുണ്ട്.
പോസ്റ്റ് ഗ്രാജുവേറ്റ് ബിരുദം മാത്രം നേടിയവര് ബി.എഡ് കോഴ്സ് അവസാന വര്ഷം പഠിച്ചുകൊണ്ടിരിക്കുന്നവര് ആയിരിക്കണം, അവസാനവര്ഷ പോസ്റ്റ് ഗ്രാജുവേറ്റ് കോഴ്സ് പഠിക്കുന്നവര്ക്ക് ബി.എഡ്. ബിരുദം ഉണ്ടായിരിക്കണം, ഈ നിബന്ധന പ്രകാരം സെറ്റ് പരീക്ഷ എഴുതുന്നവര് അവരുടെ പി.ജി./ബി.എഡ്. പരീക്ഷയുടെ നിശ്ചിത യോഗ്യത സെറ്റ് പരീക്ഷയുടെ ഫലം പ്രഖ്യാപിച്ച തീയതി മുതല് ഒരു വര്ഷത്തിനകം നേടിയിരിക്കണം. അല്ലാത്തപക്ഷം അവരെ ആ ചാന്സില് സെറ്റ് പരീക്ഷ പാസായതായി പരിഗണിക്കില്ല.
ജനറല്/ഒ.ബി.സി. വിഭാഗങ്ങളില്പ്പെടുന്നവര് പരീക്ഷാ ഫീസിനത്തില് 1000 രൂപയും, എസ്.സി./എസ്.ടി./പി.ഡബ്ലിയു.ഡി. എന്നീ വിഭാഗങ്ങളില്പ്പെടുന്നവര് 500 രൂപയും ഓണ്ലൈന് ആയി ഒടുക്കേണ്ടതാണ്.പി.ഡബ്ലിയു.ഡി. വിഭാഗത്തില്പെടുന്നവര് മെഡിക്കല് സര്ട്ടിഫിക്കറ്റിന്റെ ഗസറ്റഡ് ഓഫീസര് സാക്ഷ്യപ്പെടുത്തിയ പകര്പ്പ്, എസ്.സി./എസ്.ടി./ വിഭാഗങ്ങളില്പ്പെടുന്നവര് ജാതി തെളിയിക്കുന്ന സര്ട്ടിഫിക്കറ്റിന്റെ ഒറിജിനല്, ഒ.ബി.സി. നോണ്ക്രീമിലെയര് വിഭാഗത്തില്പ്പെടുന്നവര് നോണ്ക്രീമിലെയര് സര്ട്ടിഫിക്കറ്റിന്റെ ഒറിജിനല് (2022 സെപ്റ്റംബര് 26 നും 2023 ഒക്ടോബര് 25 നും ഇടയില് ലഭിച്ചതായിരിക്കണം.) എന്നിവ സെറ്റ് പാസ്സാകുന്ന പക്ഷം അപേക്ഷയോടൊപ്പം ഹാജരാക്കണം.
