“അവന് നിരസിക്കാനാകാത്ത ഒരു വാഗ്ദാനം ഞാന്‍ മുന്നോട്ടുവച്ചു” എന്ന ഗോഡ്ഫാദര്‍ ഡയലോഗിന്‍റെ പഞ്ചാണ് ഗ്യാംഗ്സ്റ്റര്‍ എന്ന സിനിമയുടെ ഓരോ രംഗത്തിനും. സിനിമ തുടങ്ങി അല്‍പ്പസമയം കൊണ്ടുതന്നെ പ്രേക്ഷകരെ വലിച്ചടുപ്പിക്കും വിധം അസാധാരണമായ മേക്കിംഗ്. മമ്മൂട്ടി ആരാധകരെ ആവേശം കൊള്ളിക്കുന്ന ഘടകങ്ങളെല്ലാം ഉള്‍പ്പെടുത്തിയിരിക്കുമ്പോള്‍ തന്നെ മലയാളത്തിലെ ഏറ്റവും മികച്ച ഗ്യാംഗ്സ്റ്റര്‍ മൂവിയായി ചിത്രത്തെ മാറ്റിയെടുക്കാനും ആഷിക് അബുവിന് കഴിഞ്ഞിരിക്കുന്നു.
മുംബൈ അധോലോകനായകനായിരുന്ന പിതാവ് കൊല്ലപ്പെട്ടതിന് ശേഷമാണ് അക്ബര്‍ അലി(മമ്മൂട്ടി) മംഗലാപുരത്തേക്ക് തന്‍റെ സങ്കേതം മാറ്റുന്നത്. പിതാവിനെ കൊലപ്പെടുത്തിയവരോട് അക്ബര്‍ പ്രതികാരം ചെയ്തു. എന്നാല്‍ മംഗലാപുരത്ത് അക്ബര്‍ അലിയെ കാത്തിരുന്നത് രണ്ട് വൃദ്ധസിംഹങ്ങളായിരുന്നു. ആ തുറമുഖനഗരം ഭരിച്ചിരുന്ന മണി മേനോനും(കുഞ്ചന്‍) അങ്കിള്‍ സാമും(ജോണ്‍ പോള്‍).
