പൃഥ്വിരാജും ചാക്കോച്ചനും കഴിഞ്ഞാല്‍ പിന്നെ വീണ്ടും വലിയതാരം, ദിലീപ്!
WEBDUNIA|
PRO
മോഹന്‍ലാലിനെ നായകനാക്കി റോഷന്‍ ആന്‍ഡ്രൂസ് ‘കാസനോവ’ ഒരുക്കിയപ്പോള്‍ പ്രേക്ഷക പ്രതീക്ഷ ആകാശത്തോളം വളര്‍ന്നിരുന്നു. എന്നാല്‍ ആ സിനിമ തവിടുപൊടിയായപ്പോള്‍ റോഷനും ഒന്ന് കളം മാറിച്ചവിട്ടി. മോഹന്‍ലാലിനെപ്പോലെയുള്ള വലിയ താരങ്ങളുടെ സിനിമകള്‍ തല്‍ക്കാലം ചെയ്യേണ്ട എന്നായിരുന്നു തീരുമാനം. അതിന്‍റെ ഭാഗമായി ‘മുംബൈ പൊലീസ്’ എത്തുകയാണ്. പൃഥ്വിരാജാണ് അതിലെ ഹീറോ. അതിന് ശേഷം കുഞ്ചാക്കോ ബോബനെ നായകനാക്കി ‘ഹൌ ഓള്‍ഡ് ആര്‍ യു?’.
ഈ സിനിമകള്‍ പൂര്‍ത്തിയായിക്കഴിഞ്ഞാല്‍ റോഷന്‍ ആന്‍ഡ്രൂസ് വീണ്ടും സൂപ്പര്‍താര സിനിമയിലേക്ക് മടങ്ങിയെത്തും. പക്ഷേ അപ്പോള്‍ മോഹന്ലാല് ആയിരിക്കില്ല കൂട്ടിന് എന്നുമാത്രം. ദിലീപിനെ നായകനാക്കിയാണ് റോഷന്‍ ആന്‍ഡ്രൂസ് സിനിമയൊരുക്കാന്‍ ആലോചിക്കുന്നത്. റോഷന്‍റെ സ്ഥിരം എഴുത്തുകാരായ സഞ്ജയ് - ബോബി ടീം ആണ് ഈ സിനിമയുടെയും രചന.
‘ഇവിടം സ്വര്‍ഗമാണ്’ ശൈലിയില്‍ ഒരു പക്കാ കുടുംബചിത്രമാണ് ദിലീപിനെ നായകനാക്കി റോഷന്‍ ആന്‍ഡ്രൂസ് സംവിധാനം ചെയ്യുന്നത്. ‘എന്‍റെ വീട് അപ്പൂന്‍റേം’ കഴിഞ്ഞ് അതുപോലെ നല്ലൊരു കുടുംബചിത്രം എന്ന ആലോചനയാണ് സഞ്ജയിനെയും ബോബിയെയും ഈ പ്രൊജക്ടിലേക്ക് എത്തിച്ചത്. മാത്രമല്ല, സഞ്ജയ് - ബോബി ടീമിന്‍റെ രചനയില്‍ ഒരു സിനിമ ചെയ്യണമെന്ന് ദിലീപും ആഗ്രഹം പ്രകടിപ്പിച്ചിരുന്നു.
ദിലീപും റോഷന്‍ ആന്‍ഡ്രൂസും ഈ സിനിമയുടെ പ്രാഥമിക ചര്‍ച്ചകള്‍ പൂര്‍ത്തിയാക്കിക്കഴിഞ്ഞു. റോഷന്‍ ആന്‍ഡ്രൂസിന്‍റെ മറ്റ് പ്രൊജക്ടുകളില്‍ നിന്ന് വ്യത്യസ്തമായി കുറഞ്ഞ ബജറ്റിലായിരിക്കും ഈ സിനിമ ഒരുക്കുക.
