BIJU|
Last Modified തിങ്കള്‍, 29 ജനുവരി 2018 (18:52 IST)
നല്ല സിനിമകള്‍ ചെയ്യുന്നതിന് മമ്മൂട്ടിക്ക് പ്രതിഫലം ഒരു തടസമാകാറില്ല. മലയാളിക്ക് അഭിമാനിക്കാന്‍ ഇടനല്‍കുന്ന പല നല്ല ചിത്രങ്ങളും മമ്മൂട്ടിയില്‍ നിന്നുണ്ടായത് അങ്ങനെയാണ്. ഇപ്പോഴും അദ്ദേഹം ആ ശീലം തുടരുന്നു.
ജോയ് മാത്യു തിരക്കഥയെഴുതി നിര്‍മ്മിക്കുന്ന ‘അങ്കിള്‍’ എന്ന ചിത്രത്തില്‍ പ്രതിഫലം വാങ്ങാതെയാണ് മമ്മൂട്ടി അഭിനയിച്ചത്. നവാഗതനായ ഗിരീഷ് ദാമോദര്‍ ആണ് ചിത്രം സംവിധാനം ചെയ്തത്. രസകരമായ സംഗതി ഈ സിനിമ റിലീസിന് മുമ്പേ ലാഭം നേടിയിരിക്കുന്നു എന്നതാണ്.
അങ്കിളിന്‍റെ സാറ്റലൈറ്റ് അവകാശം വന്‍ തുക മുടക്കി ഒരു ചാനല്‍ വാങ്ങി. ഒരു മമ്മൂട്ടിച്ചിത്രത്തിന് ലഭിക്കുന്ന ഏറ്റവും വലിയ സാറ്റലൈറ്റ് തുകയാണിതെന്നാണ് വിവരം. അതേസമയം തന്നെ, വലിയ തുകയ്ക്ക് അങ്കിളിന്‍റെ തമിഴ്, തെലുങ്ക് റീമേക്ക് അവകാശങ്ങള്‍ വിറ്റുപോവുകയും ചെയ്തു.
മമ്മൂട്ടിക്ക് ഇനി ഈ സിനിമയുടെ പ്രതിഫലം കൊടുക്കാന്‍ കഴിയുമെന്ന വിശ്വാസം നിര്‍മ്മാതാവ് ജോയ് മാത്യുവിനുണ്ട്. ഒരു പതിനേഴുകാരിയുടെയും അവളുടെ പിതാവിന്‍റെ സുഹൃത്തിന്‍റെയും സവിശേഷതകളുള്ള ബന്ധത്തിന്‍റെ കഥയാണ് അങ്കിള്‍.
സി ഐ എയില്‍ ദുല്‍ക്കറിന്‍റെ നായികയായിരുന്ന കാര്‍ത്തിക മുരളീധരനാണ് അങ്കിളിലെ നായിക. മമ്മൂട്ടി സോള്‍ട്ട് ആന്‍റ് പെപ്പര്‍ ലുക്കിലാണ് എത്തുന്നത് എന്നതും അങ്കിളിന്‍റെ പ്രത്യേകതയാണ്.
