കടലാഴങ്ങള്‍ അളക്കാന്‍ തുനിഞ്ഞ് പൃഥ്വിരാജ്. പുതിയ സിനിമയില്‍ ഏറ്റവും സാഹസികവും പ്രത്യേകതയുള്ളതുമായ കഥാപാത്രത്തെ അവതരിപ്പിക്കുകയാണ് കിംഗ് സ്റ്റാര്‍. സച്ചി സംവിധാനം ചെയ്യുന്ന 'അനാര്‍ക്കലി' എന്ന ചിത്രത്തിലാണ് കടല്‍ ഡൈവിംഗ് പരിശീലകനായി പൃഥ്വി എത്തുന്നത്. കവരത്തിയിലും ലക്ഷദ്വീപിലുമായി ചിത്രീകരിച്ചിരിക്കുന്ന സിനിമയില്‍ പായല്‍ ഗോറും മിയയുമാണ് നായികമാര്‍.
സാഹസികതയും പ്രണയവും നര്‍മ്മവും നിറഞ്ഞ ഒരു ഫീല്‍ ഗുഡ് മൂവിയാണ് അനാര്‍ക്കലിയെന്ന് സംവിധായകന്‍ സച്ചി പറയുന്നു. കടല്‍ ഡൈവിംഗ് പരിശീലകനായ ശന്തനു എന്ന കഥാപാത്രത്തെയാണ് പൃഥ്വി അവതരിപ്പിക്കുന്നത്. ലക്നൌവില്‍ നിന്നുള്ള നവാബി പെണ്‍കുട്ടി നാദിറാ ഇമാം എന്ന കഥാപാത്രത്തെ പായല്‍ ഗോര്‍ അവതരിപ്പിക്കുന്നു. പായലിന്‍റെ പിതാവായി എത്തുന്നത് സാക്ഷാല്‍ കബീര്‍ ബേദി.
ഷെറിന്‍ മാത്യു എന്ന ഡോക്ടര്‍ കഥാപാത്രത്തെയാണ് മിയ ജോര്‍ജ് അവതരിപ്പിക്കുന്നത്. രണ്‍ജി പണിക്കര്‍, മേജര്‍ രവി, ശ്യാമപ്രസാദ്, വി കെ പ്രകാശ് എന്നീ സംവിധായകരെ ഈ സിനിമയില്‍ അഭിനേതാക്കളായി കാണാം. ചിത്രത്തിന്റെ ട്രെയിലര്‍ പുറത്തിറങ്ങി. ഗംഭീര അഭിപ്രായമാണ് ട്രെയിലറിനെക്കുറിച്ച് ഉയര്‍ന്നിരിക്കുന്നത്. പൃഥ്വിയും ബിജുമേനോനും ഒത്തുള്ള കോമഡി രംഗങ്ങള്‍ ചിത്രത്തിന്റെ ഹൈലൈറ്റാണ്.
ചോക്ലേറ്റ്, റോബിന്‍‌ഹുഡ്, മേക്കപ്പ്‌മാന്‍, സീനിയേഴ്സ്, ഡബിള്‍സ്, റണ്‍ ബേബി റണ്‍, ചേട്ടായീസ് തുടങ്ങിയ സിനിമകളുടെ തിരക്കഥാകൃത്താണ് സച്ചി.
