മോഹൻലാൽ-രഞ്ജിത്ത് കൂട്ടുകെട്ട് വീണ്ടും. മലയാളത്തിന് നിരവധി മികച്ച ആക്ഷൻ സിനിമകൾ സമ്മാനിച്ച ഈ കൂട്ടുകെട്ട് ഇത്തവണ കോമഡി എന്റർടെയ്‌നറാണ് ഒരുക്കുന്നതെന്നാണ് റിപ്പോർട്ടുകൾ. ബിലാത്തിക്കഥ എന്ന ചിത്രത്തിന് വേണ്ടിയാണ് ഇരുവരും വീണ്ടും ഒന്നുക്കുന്നതെന്ന് വാർത്തകൾ ഉണ്ടായിരുന്നെങ്കിലും ആ ചിത്രമല്ല അണിയറയിൽ ഒരുങ്ങുന്നതെന്നാണ് സൂചനകൾ.

മെയ് 10 മുതൽ ജൂൺ 25 വരെ നീളുന്ന 45 ദിവസങ്ങളാണ് മോഹൻലാൽ ഈ ചിത്രത്തിന് വേണ്ടി മാറ്റിവെച്ചിരിക്കുന്നത്. ലണ്ടനിൽ ഷൂട്ടിംഗ് പുരോഗമിച്ചിരിക്കുന്ന ചിത്രത്തിന്റെ പേര് റെസ്‌റ്റ് ഇൻ പീസ് എന്നാണെന്നും സൂചനയുണ്ട്. ലണ്ടനിലെ ബന്ധുക്കളെ കാണാനെത്തുന്ന ഒരു വൃദ്ധ അവിടെ നിന്ന് മരിക്കുന്നതും അതേത്തുടർന്ന് പിന്നീടുണ്ടാകുന്ന സംഭവങ്ങൾ രസകരമായി പ്രേക്ഷകരിലേക്ക് എത്തിക്കാൻ ശ്രമിക്കുകയുമാണ് ഈ ചിത്രം എന്നും റിപ്പോർട്ടുകളുണ്ട്.

മലയാളത്തില്‍ ആദ്യമായി പത്തുകോടി രൂപ കളക്ഷന്‍ നേടി ഹിറ്റായി മാറിയ മോഹന്‍ലാൽ‍- പ്രിയദര്‍ശന്‍ ചിത്രം ചന്ദ്രലേഖ ഇത്തരത്തിലുള്ളൊരു ചിത്രമായിരുന്നു. സേതുവാണ് ചിത്രത്തിന്റെ തിരക്കഥയൊരുക്കുന്നത്. ലില്ലി പാഡ് മോഷന്‍ പിക്ചേഴ്സിന്റെയും വര്‍ണ്ണചിത്ര ഗുഡ്‌ലൈന്‍ പ്രൊഡക്ഷന്‍സിന്റെയും ബാനറില്‍ സുബൈര്‍ എൻ‍. പി, എൻ‍. കെ. നാസര്‍ എന്നിവരാണ് ബിലാത്തിക്കഥ നിര്‍മ്മിക്കുന്നത്. അനു സിത്താര, ജ്യുവല്‍ മേരി,കനിഹ തുടങ്ങിയവരാണ് ചിത്രത്തിൽ നായികമാരായെത്തുന്നത്‍.