രേണുക വേണു|
Last Modified ബുധന്‍, 20 മാര്‍ച്ച് 2024 (12:38 IST)
മലയാളത്തിലെ ആദ്യ 200 കോടി ചിത്രമായി മഞ്ഞുമ്മല്‍ ബോയ്സ്. റിലീസ് ചെയ്ത് 26 ദിവസം കൊണ്ടാണ് ഈ നേട്ടം കൈവരിച്ചത്. മലയാളത്തിലെ ഏറ്റവും ഉയര്‍ന്ന ബോക്‌സ്ഓഫീസ് കളക്ഷന്‍ തങ്ങളുടെ പേരിലാക്കിയ മഞ്ഞുമ്മല്‍ ബോയ്സ് ഇപ്പോഴും ജൈത്രയാത്ര തുടരുകയാണ്.
ജൂഡ് ആന്തണി ചിത്രം 2018 നെ മറികടന്നാണ് മഞ്ഞുമ്മല്‍ ബോയ്സ് മലയാളത്തിലെ ഏറ്റവും കൂടുതല്‍ കളക്ഷന്‍ നേടുന്ന ചിത്രമായത്. റിലീസ് ചെയ്തു 12 ദിവസം കൊണ്ടാണ് മഞ്ഞുമ്മല്‍ ബോയ്സ് 100 കോടി ക്ലബില്‍ ഇടംപിടിച്ചത്. മലയാളത്തിനു പുറത്ത് തമിഴ്‌നാട്ടില്‍ നിന്ന് മികച്ച കളക്ഷനാണ് ചിത്രത്തിനു ലഭിച്ചത്. മമ്മൂട്ടി, മോഹന്‍ലാല്‍, ദുല്‍ഖര്‍ സല്‍മാന്‍, പൃഥ്വിരാജ് തുടങ്ങി പാന്‍ ഇന്ത്യന്‍ സൂപ്പര്‍താരങ്ങള്‍ ഉണ്ടായിട്ടും അവര്‍ക്കൊന്നും സ്വന്തമാക്കാന്‍ കഴിയാത്ത നേട്ടമാണ് മഞ്ഞുമ്മല്‍ ബോയ്‌സിലൂടെ യുവതാരങ്ങള്‍ സ്വന്തമാക്കിയത്.
സൗബിന്‍ ഷാഹിര്‍, ശ്രീനാഥ് ഭാസി, ബാലു വര്‍ഗീസ്, ഗണപതി എന്നിവരെ കേന്ദ്ര കഥാപാത്രങ്ങളാക്കി ചിദംബരം സംവിധാനം ചെയ്ത ചിത്രമാണ് മഞ്ഞുമ്മല്‍ ബോയ്സ്. പറവ ഫിലിംസിന്റെ ബാനറില്‍ ബാബു ഷാഹിര്‍, സൗബിന്‍ ഷാഹിര്‍, ഷോണ്‍ ആന്റണി എന്നിവര്‍ ചേര്‍ന്നാണ് ചിത്രം നിര്‍മിച്ചിരിക്കുന്നത്. ഷൈജു ഖാലിദ് ആണ് ക്യാമറ. ശ്രീ ഗോകുലം മൂവീസാണ് ചിത്രം കേരളത്തില്‍ റിലീസിനെത്തിച്ചിരിക്കുന്നത്. എറണാകുളത്തെ മഞ്ഞുമ്മല്‍ എന്ന സ്ഥലത്തുള്ള 11 യുവാക്കളുടെ കഥയാണ് ചിത്രം പറയുന്നത്. ഈ സംഘം കൊടൈക്കനാലിലേക്ക് ഒരു ഉല്ലാസ യാത്ര പോകുന്നു. രസകരമായ ഈ യാത്രക്കിടയില്‍ മഞ്ഞുമ്മല്‍ സംഘം ഗുണ ഗുഹയില്‍ അകപ്പെടുന്നു. അവിടെ നിന്ന് രക്ഷപ്പെടാനുള്ള ഇവരുടെ പരിശ്രമങ്ങളെ ഉദ്വേഗജനകമായ രീതിയില്‍ അവതരിപ്പിച്ചിരിക്കുകയാണ് ചിത്രത്തില്‍.
