BIJU|
Last Modified തിങ്കള്‍, 17 സെപ്‌റ്റംബര്‍ 2018 (15:12 IST)
ഉദയ്കൃഷ്ണ തിരക്കഥയെഴുതുന്ന ചിത്രം അരുണ്‍ ഗോപി സംവിധാനം ചെയ്യുന്നു. കൃഷ്ണകൃപയുടെ ബാനറില്‍ സംവിധായകന്‍ കെ മധു നിര്‍മ്മിക്കുന്ന ചിത്രത്തില്‍ മമ്മൂട്ടി നായകനാകുമെന്ന് സൂചന.
വൈശാഖിനുവേണ്ടി മധുരരാജയുടെ ക്ലൈമാക്സ് രംഗങ്ങള്‍ എഴുതുന്ന തിരക്കിലാണ് ഇപ്പോള്‍ ഉദയ്കൃഷ്ണ. മധുരരാജയുടെ ചിത്രകരണം പകുതിയോളമായി. ആ ചിത്രത്തിന്‍റെ ഷൂട്ടിംഗ് അവസാനിക്കുന്നതിന് മുമ്പുതന്നെ അരുണ്‍ ഗോപി ചിത്രത്തിന്‍റെ തിരക്കഥ പൂര്‍ത്തിയാക്കാനാണ് ഉദയ്കൃഷ്ണയുടെ പദ്ധതി.
മമ്മൂട്ടിയായിരിക്കും ഈ സിനിമയിലെ നായകനെന്നാണ് ലഭിക്കുന്ന വിവരം. കെ മധുവിന്‍റെ സി ബി ഐ സീരീസിലെ അഞ്ചാം ചിത്രത്തിനായുള്ള ഒരുക്കങ്ങളും അണിയറയില്‍ നടക്കുന്നുണ്ട്. എന്നാല്‍ അതിന് മുമ്പ് കെ മധു നിര്‍മ്മിക്കുന്ന സിനിമയില്‍ മമ്മൂട്ടി അഭിനയിക്കുമെന്നാണ് സൂചനകള്‍.
രാമലീല എന്ന ആദ്യചിത്രം മെഗാഹിറ്റാക്കിയ അരുണ്‍ ഗോപി ഇപ്പോള്‍ പ്രണവ് മോഹന്‍ലാലിനെ നായകനാക്കി ഇരുപത്തിയൊന്നാം നൂറ്റാണ്ട് സംവിധാനം ചെയ്തുകൊണ്ടിരിക്കുകയാണ്. അതിന് ശേഷം ഉദയ്കൃഷ്ണയുടെ തിരക്കഥയിലൊരുങ്ങുന്ന സിനിമയിലേക്ക് കടക്കും.
അരുണ്‍ ഗോപി - ഉദയ്കൃഷ്ണ ടീമിന്‍റേത് ഒരു മാസ് ആക്ഷന്‍ എന്‍റര്‍ടെയ്നര്‍ ചിത്രമായിരിക്കും. മമ്മൂട്ടി കൂടി ടീമിലേക്കെത്തുന്നതോടെ ഒരു ഷുവര്‍ ഹിറ്റ് പിറക്കുമെന്നതില്‍ രണ്ട് അഭിപ്രായമില്ല.
