കുടുംബത്തിന്‍റെ ഐശ്വര്യത്തിനും സമാധാനത്തിനുമായാണ് ഗോത്രവര്‍ഗ്ഗക്കാര്‍ വിചിത്രമായ ഈ ആചാരം പിന്തുടരുന്നത്. ഈ ആചാരം അനുഷ്ഠിക്കും മുന്‍പ് അന്നപാനീയങ്ങള്‍ ഉപേക്ഷിച്ച് ഒരു ദിവസത്തെ വ്രതമെടുക്കേണ്ടതുണ്ട്.
കാലികള്‍ ശരീരത്തിലൂടെ കടന്ന് പോകുമ്പോള്‍ നിരവധി പേര്‍ക്ക് പരിക്കേല്‍ക്കാറുണ്ട്. എന്നാല്‍, ഇതൊന്നും ഗോത്രവര്‍ഗ്ഗക്കാരുടെ ആവേശം കെടുത്തുന്നില്ല. എല്ലാ വര്‍ഷവും ഈ ആചാരം അനുഷ്ഠിക്കാന്‍ വന്‍ തിരക്കാണ് അനുഭവപ്പെടുന്നത്. ഈ ആചാരം അനുഷ്ഠിക്കുന്നവര്‍ക്ക് ജീവിതത്തില്‍ ഒരു ക്ലേശവും അനുഭവിക്കേണ്ടി വരില്ലെന്ന് ഗോവര്‍ദ്ധന ക്ഷേത്രത്തിലെ പൂജാരി പറഞ്ഞു.
ഗോത്രവര്‍ഗ്ഗക്കാര്‍ക്ക് അടിയുറച്ച വിശ്വാസമാണ് ഈ ആചാരത്തിലുള്ളത്. പശുവിന്‍റെ പാദത്തില്‍ സ്പര്‍ശിക്കുന്നത് സ്വന്തം മാതാവിന്‍റെ പാദത്തില്‍ സ്പര്‍ശിക്കുന്നതിന് തുല്യമാണെന്നാണ് ഇവര്‍ കരുതുന്നത്. ഗോമാതാവിന്‍റെ അനുഗ്രഹത്തിനായി എന്ത് വേദന സഹിക്കാനും ഇവര്‍ തയാറാകുന്നു.
ചിലര്‍ തമാശയ്ക്കായി പശുക്കളുടെ കൂട്ടത്തില്‍ കാളകളെയും ഉള്‍പ്പെടുത്തുന്നതാണ് ആചാ‍രത്തിന്‍റെ അപകടസാധ്യത വര്‍ദ്ധിപ്പിക്കുന്നത്. ചിലപ്പോള്‍ പശുക്കളുടെ വാലില്‍ പടക്കവും കെട്ടിയിടുന്നു. അനുഗ്രഹം തേടി എത്തുന്ന ഗോത്ര വര്‍ഗ്ഗക്കാര്‍ മൂക്കറ്റം മദ്യപിച്ച അവസ്ഥയിലായിരിക്കും എന്നതും ആപത് സാധ്യത കൂട്ടുന്നു.
