ഐപിഎല്ലിൽ പുതുതായി രണ്ട് ടീമുകളെ കൂടി ഉൾപ്പെടുത്താൻ ബിസിസിഐ വാർഷിക പൊതുയോഗത്തിൽ തീരുമാനം. എന്നാൽ അടുത്ത സീസൺ മുതൽ ഈ മാറ്റം നടപ്പിൽ വരില്ല. 2022 മുതലായിരിക്കും രണ്ട് ടീമുകളെ കൂടി ഉൾപ്പെടുത്തി ഐപിഎൽ വിപുലപ്പെടുത്തുന്നത്.

മാർച്ച്- മെയ് മാസങ്ങളിലാണ് അടുത്ത ഐപിഎൽ സീസൺ നടക്കുന്നത്. പുതിയ ടീമുകളെ ഇതിന് മുൻപ് ഉൾപ്പെടുത്തുകയാണെങ്കിൽ സീസണിന് മുൻപ് പുതിയ ടീമുകള്‍ക്കായി അപേക്ഷ ക്ഷണിക്കാനും കളിക്കാരുടെ ലേലം ഉറപ്പാക്കാനും ടീമുകള്‍ക്ക് തയാറെടുപ്പിനും വേണ്ടത്ര സമയം ലഭിക്കില്ല. ഇതോടെയാണ് തീരുമാനം 2022ലെ സീസണിലേക്ക് മാറ്റിവെച്ചത്.ഇതോടെ ഇത്തവണ പൂര്‍ണ താരലേലം ഉണ്ടാകില്ലെന്നും ഉറപ്പായി.

2028ലെ ലോസ് ഏയ്ഞ്ചല്‍സ് ഒളിംപിക്സില്‍ ക്രിക്കറ്റ് മത്സരയിനമായി ഉള്‍പ്പെടുത്താനുള്ള ഐസിസി നീക്കത്തിന് പിന്തുണ നൽകാനും യോഗത്തിൽ തീരുമാനമായി. ഐസിസി ബോര്‍ഡില്‍ ഡയറക്ടറായി തുടരാന്‍ ബിസിസിഐ പ്രസിഡന്‍റ് സൗരവ് ഗാംഗുലിക്ക് യോഗം അനുമതി നല്‍കുകയും ചെയ്‌തു.