Last Modified വ്യാഴം, 21 ജൂലൈ 2016 (15:35 IST)
വെള്ളിമൂങ്ങ ആരും മറന്നിട്ടില്ലല്ലോ. എങ്കിലിതാ വെള്ളിമൂങ്ങയുടെ സംവിധായകന്‍ ജിബു ജേക്കബ് സംവിധാനം ചെയ്യുന്ന പുതിയ ചിത്രം വരുന്നു. നായകന്‍ സാക്ഷാല്‍ മോഹന്‍ലാല്‍. നായിക മീന. മോഹന്‍ലാലിന്‍റെ കൂട്ടുകാരനായി അനൂപ് മേനോനും.
എം സിന്ധുരാജ് തിരക്കഥയെഴുതുന്ന ചിത്രത്തില്‍ പഞ്ചായത്ത് സെക്രട്ടറി ഉലഹന്നാന്‍ എന്ന കഥാപാത്രത്തെയാണ് മോഹന്‍ലാല്‍ അവതരിപ്പിക്കുന്നത്. ഭാര്യ ആനിയായി
മീന എത്തും. ഉലഹന്നാന്‍റെ സുഹൃത്ത് വേണുക്കുട്ടനായാണ് അനൂപ് മേണോന്‍ വരുന്നത്.
പൂര്‍ണമായും ഒരു കോമഡി എന്‍റര്‍ടെയ്നറായിരിക്കും ഈ സിനിമ. വി ജെ ജയിംസിന്‍റെ പ്രണയോപനിഷത് എന്ന കഥയുടെ സിനിമാവിഷ്കാരമാണിത് എന്ന് സൂചനയുണ്ട്.
ദൃശ്യത്തിന് ശേഷം മോഹന്‍ലാലും മീനയും ഒന്നിക്കുന്നു എന്ന പ്രത്യേകതയും ഈ പ്രൊജക്ടിനുണ്ട്. വീക്കെന്‍ഡ് ബ്ലോക്ബസ്റ്റേഴ്സിന്‍റെ ബാ‍നറില്‍ സോഫിയ പോള്‍ ആണ് ചിത്രം നിര്‍മ്മിക്കുന്നത്. അലന്‍സിയര്‍ ലേ ലോപ്പസ്, നെടുമുടി വേണു, സുരാജ് വെഞ്ഞാറമൂട്, സുധീര്‍ കരമന, സ്രിന്ദ തുടങ്ങിയവരും ഈ സിനിമയില്‍ അഭിനയിക്കുന്നുണ്ട്.
