വിനീത് ശ്രീനിവാസന്‍ സംവിധാനം ചെയ്ത ത്രില്ലര്‍ ചിത്രമായിരുന്നു തിര. ശോഭനയും ധ്യാന്‍ ശ്രീനിവാസനും പ്രധാനവേഷത്തില്‍ എത്തിയ ഈ ചിത്രം ഏറെ നിരൂപക പ്രശംസ നേടിയ സിനിമ കൂടിയാണ്. ഇപ്പോഴിതാ തിര രണ്ടാം ഭാഗം അണിയറയില്‍ ഒരുങ്ങുന്നുണ്ടെന്ന വിവരം കൈമാറിയിരിക്കുകയാണ് ധ്യാന്‍ ശ്രീനിവാസന്‍.

രാകേഷ് മാന്തോടിയാണ് സിനിമയുടെ തിരക്കഥ ഒരുക്കിയിരിക്കുന്നത്. തിരക്കഥാകൃത്ത് മലയാളത്തിലെ ഒരു പ്രശസ്ത സംവിധായകനുമായി സിനിമയുമായി ബന്ധപ്പെട്ട സംസാരിച്ചിട്ടുണ്ടെന്നും ധ്യാന്‍ ശ്രീനിവാസന്‍ വെളിപ്പെടുത്തി.

'തിര 2 എന്തായാലും ചേട്ടന്‍ ചെയ്യുന്നില്ല എന്ന് തീരുമാനിച്ചിട്ടുണ്ട്. ചേട്ടന്‍ അത് സംവിധാനം ചെയ്യുന്നില്ല എന്നാണ് പറയുന്നത്. ഞാന്‍ ഉത്തരവാദിത്തം ഏറ്റെടുത്ത് എന്റെ സുഹൃത്തായ മറ്റൊരു സംവിധായകനോട് സംസാരിച്ചിട്ടുണ്ട്. കഴിഞ്ഞവര്‍ഷത്തെ ഒരു ഏറ്റവും വലിയ സിനിമ ചെയ്ത സംവിധായകനാണ് അദ്ദേഹം. അവനോട് സംസാരിച്ചിട്ടുണ്ട്.

പുള്ളിക്ക് ചെയ്യാന്‍ താല്പര്യമുണ്ട്. അതിന്റെ പ്ലാനിങ് നടക്കുകയാണ്. അതിന്റെ ഒരു പൈപ്പ് ലൈനിലാണ്. അവന്‍ ചെയ്യുന്നില്ലെങ്കില്‍ ഞാന്‍ തന്നെ ചെയ്യും എന്നാണ് തീരുമാനിച്ചത്',- ധ്യാന്‍ ശ്രീനിവാസന്‍ പറഞ്ഞു.

2014 നവംബറില്‍ തിയറ്ററിലെത്തിയ തിര മുന്‍ നിര താരങ്ങളുടെ അഭിനയമികവു കൊണ്ടും സംവിധാനമികവുകൊണ്ടും ഏറെ ശ്രദ്ധിക്കപ്പെട്ടിരുന്നു.

വിനീത് ശ്രീനിവാസന്‍ ചെന്നൈയിലെ ബസന്ത് നഗറില്‍ താമസിക്കുന്ന സമയത്തായിരുന്നു തിരയുടെ പ്രീ പ്രൊഡക്ഷന്‍ ജോലികള്‍ നടന്നിരുന്നത്.