പ്രശാന്ത് വര്‍മ സിനിമാറ്റിക് യൂണിവേഴ്‌സില്‍ എത്തുന്ന ജയ് ഹനുമാന്‍ സിനിമയില്‍ ടൈറ്റില്‍ വേഷത്തില്‍ കന്നഡ താരം റിഷഭ് ഷെട്ടി എത്തും. സിനിമയുടെ ഫസ്റ്റ്‌ലുക്ക് പോസ്റ്റര്‍ റിലീസ് ചെയ്തു. ശ്രീരാമ വിഗ്രഹം കയ്യില്‍ ചേര്‍ത്ത് പിടിച്ചിട്ടുള്ള ഹനുമാന്റെ ചിത്രമാണ് ഫസ്റ്റ്‌ലുക്കിലുള്ളത്.

ഈ വര്‍ഷത്തെ ഹിറ്റ് സിനിമകളില്‍ ഒന്നായിരുന്നു തെലുങ്കില്‍ പുറത്തിറങ്ങിയ ഹനുമാന്‍ എന്ന സിനിമ. തന്റെ സിനിമാറ്റിക് യൂണിവേഴ്‌സിലെ ആദ്യസിനിമയാണ് ഇതെന്ന് സംവിധായകന്‍ പ്രശാന്ത് വര്‍മ പറഞ്ഞിരുന്നു. ഈ സിനിമയുടെ രണ്ടാം ഭാഗമായാണ് ജയ് ഹനുമാന്‍ ഒരുങ്ങുന്നത്. പുഷ്പ,ജനതാ ഗാരേജ്,രംഗസ്ഥലം തുടങ്ങിയ സിനിമകളുടെ നിര്‍മാതാക്കളായ മൈത്രി മൂവി മേക്കേഴ്‌സാണ് സിനിമയുടെ നിര്‍മാണം. 40 കോടി മുതല്‍മുടക്കിലെത്തിയ ആദ്യഭാഗമായ ഹനുമാന്‍ 350 കോടിയോളമാണ് ബോക്‌സോഫീസില്‍ നിന്നും കളക്റ്റ് ചെയ്തത്.