ആരോപണങ്ങള്‍ ഉയരുമ്പോള്‍ നിയമത്തെ ഭയന്ന് ഒളിച്ചോടുന്നത് ശരിയായ കാര്യമല്ലെന്ന് നടി നവ്യ നായര്‍. ഹേമ കമ്മിറ്റി റിപ്പോര്‍ട്ട് പുറത്തുവന്നതിന് പിന്നാലെ നടന്ന സംഭവവികാസങ്ങളുടെ പശ്ചാത്തലത്തിലായിരുന്നു നടിയുടെ പ്രതികരണം. ഒളിവില്‍ പോകുന്നത് നല്ലതാണെന്ന് താന്‍ പറയില്ലെന്നും കോടതിയും പൊലീസും ഇടപെട്ട ഒരു കേസിനെപ്പറ്റി അതിന് അതിന്റേതായ തീരുമാനങ്ങള്‍ വരണമെന്നും നടി പറഞ്ഞു. മാതംഗി ഫെസ്റ്റിന്റെ പത്രസമ്മേളനത്തില്‍ സംസാരിക്കുകയായിരുന്നു താരം.

ഹേമ കമ്മിറ്റി റിപ്പോര്‍ട്ടുമായി ബന്ധപ്പെട്ട ചോദ്യങ്ങളില്‍ മറുപടി നല്‍കാന്‍ തനിക്ക് മടിയില്ലെന്നും ഒന്നും പ്രതികരിച്ചില്ലെങ്കില്‍ അത്, ഒളിച്ചോട്ടമായി വ്യാഖ്യാനിക്കപ്പെടുമെന്നതിനാല്‍ അങ്ങനെ വാര്‍ത്ത വരുന്നതിനോട് തനിക്ക് താല്പര്യമില്ലെന്നും നടി വ്യക്തമാക്കി. ഒളിച്ചോടി പോകാനൊന്നും ഉദ്ദേശിക്കുന്നില്ല. നിങ്ങള്‍ക്കൊക്കെ എന്താണോ മനസില്‍ തോന്നുന്നത്, അത് തന്നെയാണ് തനിക്കും തോന്നുന്നതെന്നായിരുന്നു നവ്യയുടെ മറുപടി.

വിവാദങ്ങളും ആരോപണങ്ങളും ഉണ്ടാകുമ്പോള്‍ ഭയന്നോടുന്നത് ശരിയായ പ്രവൃത്തിയായി കാണുന്നില്ലെന്നും നവ്യ പറഞ്ഞു. സിനിമാമേഖലയില്‍ മാത്രമല്ല, എല്ലാ തൊഴില്‍രംഗങ്ങളിലും മാറ്റം അനിവാര്യമാണ്. കലാമേഖലയില്‍ ഉള്‍പ്പെടെ സ്ത്രീകളുടെ സുരക്ഷ പ്രാധാന്യമര്‍ഹിക്കുന്ന കാര്യമാണെന്നും മറ്റെല്ലാ ആളുകള്‍ക്കും ഉള്ളതുപോലെ ഇക്കാര്യത്തില്‍ വലിയ ആശങ്ക തനിക്കും ഉണ്ടെന്നും നവ്യ പറഞ്ഞു.