ആദ്യ സിനിമയായ കഥ ഇന്നുവരെയില്‍ അഭിനയിക്കാന്‍ തീരുമാനിച്ചതിനെ പറ്റിയും ഒട്ടേറെ ക്ഷണങ്ങള്‍ ലഭിച്ചിട്ടും എന്തുകൊണ്ട് സിനിമയില്‍ അഭിനയിക്കാന്‍ വൈകി എന്നതിലും പ്രതികരണം നടത്തി നര്‍ത്തകി മേതില്‍ ദേവിക. നര്‍ത്തകി എന്ന നിലയില്‍ ശ്രദ്ധേയയായ മേതില്‍ ദേവിക അഭിനയിച്ച സിനിമ സെപ്റ്റംബറിലാണ് റിലീസിനൊരുങ്ങുന്നത്. ബിജു മേനോനാണ് സിനിമയില്‍ നായകനാവുന്നത്.

കഴിഞ്ഞ 25 വര്‍ഷത്തിനിടെ നായികയായി ഒട്ടേറെ സിനിമകളില്‍ അവസരം ലഭിച്ചിരുന്നെങ്കിലും നൃത്തത്തില്‍ മാത്രം ശ്രദ്ധ ചെലുത്താനാണ് ദേവിക തീരുമാനിച്ചിരുന്നത്. എന്തുകൊണ്ടാണ് ഈ തീരുമാനമെന്ന ചോദ്യത്തില്‍ മേതില്‍ ദേവികയുടെ മറുപടി ഇങ്ങനെ. അന്ന് താത്പര്യമില്ലായിരുന്നു. കംഫര്‍ട്ടബിള്‍ അല്ലെന്ന് എനിക്ക് തന്നെ തോന്നിയിരുന്നു. പിന്നെ ഈ ടീം നല്ലതാണെന്ന് തോന്നിയതുകൊണ്ടാണ് യെസ് പറഞ്ഞത്. അതിന് ശേഷമാണല്ലോ സ്‌ക്രിപ്റ്റും പണവും എല്ലാം. മേതില്‍ ദേവിക പറഞ്ഞു.

ഹേമ കമ്മിറ്റി റിപ്പോര്‍ട്ട് വന്നതോടെ സിനിമയിലെ പ്രശ്‌നങ്ങളുടെ തീവ്രത ആളുകള്‍ക്ക് മനസിലാക്കാന്‍ സാധിച്ചെന്നും സിനിമയിലെ നടന്മാര്‍ ജീവിതത്തിലും ഹീറോയാകാന്‍ ശ്രമിക്കണമെന്നും മേതില്‍ ദേവിക പറഞ്ഞിരുന്നു. അംഗമല്ലെങ്കിലും ഡബ്യുസിസിയെ പിന്തുണയ്ക്കുന്നുവെന്നും മേതില്‍ ദേവിക പറഞ്ഞു.