വര്‍ഷങ്ങള്‍ക്കു മുന്‍പ് തന്റെ ആരാധകനു മമ്മൂട്ടി അയച്ച കത്ത് സോഷ്യല്‍ മീഡിയയില്‍ വൈറലാകുന്നു. 1985 ല്‍ തന്റെ ആരാധകന്‍ അയച്ച കത്തിനു മമ്മൂട്ടി മറുപടിയായി അയച്ച കത്തിന്റെ ചിത്രമാണ് ആരാധകര്‍ ഏറ്റെടുത്തിരിക്കുന്നത്. മറുപടി കത്ത് അയക്കാന്‍ വൈകിയതില്‍ ആരാധകനോടു മമ്മൂട്ടി ക്ഷമ ചോദിക്കുന്നതായി കത്തില്‍ കാണാം.

തന്റെ പുതിയ സിനിമയുടെ ഒരു സ്റ്റില്ലും കത്തിനൊപ്പം മമ്മൂട്ടി ആരാധകനു അയച്ചിട്ടുണ്ട്. റിലീസ് ചെയ്യാനിരിക്കുന്ന തന്റെ സിനിമ കണ്ട ശേഷം അഭിപ്രായം എഴുതി അയക്കണമെന്നും മമ്മൂട്ടി കത്തില്‍ ആവശ്യപ്പെട്ടിരിക്കുന്നു.

കത്തില്‍ എഴുതിയിരിക്കുന്നത് ഇങ്ങനെ

പ്രിയ സഹോദരാ,

കത്ത് കിട്ടി, ജോലിത്തിരക്ക് മൂലം മറുപടി അയയ്ക്കുവാന്‍ അല്പം താമസിച്ചു പോയി. ക്ഷമിക്കുമല്ലോ! എന്റെ ചിത്രങ്ങളെല്ലാം കാണാറുണ്ട്. ഇല്ലേ? നിങ്ങളെപ്പോലെയുള്ളവരുടെ സ്‌നേഹവാത്സല്യങ്ങളാണ് എന്റെ പ്രചോദനം. ഈയിടെ റിലീസ് ആകാന്‍ പോകുന്ന പ്രകാശ് മൂവി ടോണിന്റെ 'ഉപഹാരം' എന്ന ചിത്രത്തിലെ എന്റെ ഒരു സ്റ്റില്‍ ഇതോടൊപ്പം അയയ്ക്കുന്നു. ആ സിനിമ കണ്ടശേഷം അഭിപ്രായം എഴുതി അയയ്ക്കുമല്ലോ! കൂട്ടുകാരെയെല്ലാം ഞാന്‍ പ്രത്യേകം അന്വേഷിച്ചെന്ന് പറയണം

സ്‌നേഹപൂര്‍വ്വം,

നിങ്ങളുടെ മമ്മൂട്ടി

14-10-1985