കുതിരവട്ടം പപ്പുവിന്റെ 23-ാം ചരമവാര്‍ഷികമാണ് ഇന്ന്. അദ്ദേഹത്തിന്റെ ഓര്‍മ്മകളിലാണ് മകനും നടനുമായ ബിനു പപ്പു. അച്ഛനോട് സംസാരിക്കാനും തന്റെ കാര്യങ്ങള്‍ പറയുവാന്‍ ഇപ്പോഴും ആഗ്രഹിക്കുന്നു എന്നാണ് ബിനു കുറിക്കുന്നത്.

'അച്ചാ, എനിക്ക് നിങ്ങളോട് സംസാരിക്കാനും എന്റെ ദിവസങ്ങളെ കുറിച്ച് പറയാനും കഴിഞ്ഞിരുന്നെങ്കില്‍ എന്ന് ഞാന്‍ ഇപ്പോഴും ആഗ്രഹിക്കുന്നു. എല്ലാ ദിവസവും ഞാന്‍ നിങ്ങളെ മിസ് ചെയ്യുന്നു, ഞാന്‍ നിങ്ങളെ വളരെയധികം സ്‌നേഹിക്കുന്നു'-ബിനു പപ്പു കുറിച്ചു.

കുതിരവട്ടം പപ്പു ഇന്നും സിനിമ പ്രേമികളുടെ മനസ്സില്‍ ജീവിക്കുന്നു. മിനിസ്‌ക്രീനിലൂടെ എല്ലാ ദിവസവും വന്ന് നമ്മളെ ചിരിപ്പിച്ചു കൊണ്ടേയിരിക്കുന്നു. അദ്ദേഹം പോയി 23 വര്‍ഷങ്ങള്‍ പിന്നിട്ടു എന്നത് വിശ്വസിക്കാന്‍ ഒരുപക്ഷേ ആരാധകര്‍ക്ക് ആവുന്നുണ്ടാകില്ല. ഇതേ അവസ്ഥയിലാണ് മകന്‍ ബിനു പപ്പുവും.

2014ല്‍ റിലീസ് ചെയ്ത ഗുണ്ട എന്ന ചിത്രത്തിലൂടെയാണ് ബിനു പപ്പു സിനിമയിലെത്തിയത്.ഗപ്പിയില്‍ സഹസംവിധായകനായും പ്രവര്‍ത്തിച്ചു.