WEBDUNIA|
Last Modified വെള്ളി, 5 മാര്‍ച്ച് 2010 (15:28 IST)
PRO
സ്റ്റാമ്പ് ഡ്യൂട്ടി സര്‍ചാര്‍ജ് പൂര്‍ണമായും ഒഴിവാക്കുമെന്ന് ധനമന്ത്രി തോമസ് ഐസക്.2010-11 വര്‍ഷത്തേക്കുള്ള സംസ്ഥാന ബജറ്റ് നിയമസഭയില്‍ അവതരിപ്പിക്കുകയായിരുന്നു അദ്ദേഹം. സ്റ്റാമ്പ് ഡ്യൂട്ടി കോര്‍പറേഷന്‍ പരിധിയില്‍ 11 ശതമാനവും മുനിസിപ്പാലിറ്റികളില്‍ 10 ശതമാനവും പഞ്ചായത്ത് പരിധിയില്‍ ഒമ്പത് ശതമാനമാനവുമായിരിക്കും. സര്‍ക്കാരിന്‍റെ ഭവനപദ്ധതികള്‍ക്ക് സര്‍ചാര്‍ജ് പൂര്‍ണമായും ഒഴിവാക്കും.
നവീന മൂന്നാര്‍ നടാപ്പാക്കാന്‍ ബജറ്റില്‍ 20 കോടി രൂപ നീക്കിവെച്ചു. മൂന്നാര്‍ ടൌണ്‍ ടാറ്റയുടെ കൈയില്‍ നിന്ന് ഏറ്റെടുക്കാന്‍ നിയമനിര്‍മാണം നടത്തുമെന്നും ധനമന്ത്രി പറഞ്ഞു.സ്മാര്‍ട് സിറ്റി പദ്ധതിയ്ക്ക് പകരമായി ഇന്‍ഫോ പാര്‍ക്കില്‍ ഒരു ലക്ഷം പേര്‍ക്ക് തൊഴില്‍ നല്‍കാനുതകുന്ന പുതിയ പദ്ധതി നടപ്പാക്കുമെന്നും ഐസക് പറഞ്ഞു.ആദ്യഘട്ടമെന്ന നിലയില്‍ 150 ഏക്കര്‍ ഏറ്റെടുത്ത് ഇന്‍ഫോ പാര്‍ക്ക് വികസിപ്പിക്കും. സംസ്ഥാന ഐ ടി വകുപ്പിന്‍റെ മേല്‍‌നോട്ടത്തിലായിരിക്കും പുതിയ പദ്ധതി.വിഴിഞ്ഞം പദ്ധതിയ്ക്ക് 125 കോടി രൂപ നീക്കിവയ്ക്കും. സര്‍ക്കാര്‍ ഉദ്യോഗസ്ഥരുടെ ശമ്പള പരിഷ്കരണം ഈ വര്‍ഷം നടപ്പാക്കും.
വിലക്കയറ്റത്തിന്‍റെ ഉത്തരവാദിത്തം കേന്ദ്ര സര്‍ക്കാരിനാണെന്നും ആസിയാന്‍ കരാര്‍ സംസ്ഥാനത്തെ ദോഷകരമായി ബാധിച്ചുവെന്നും ബജറ്റ് അവതരിപ്പിച്ചുകൊണ്ട് ധനമന്ത്രി പറഞ്ഞു.ആസിയാന്‍ കരാറിന്‍റെ നഷ്ടം നികത്താന്‍ കേന്ദ്ര പായ്ക്കേജ് വേണം. റവന്യു കമ്മി 1.9 ശതമാനമാണ്.കമ്മിയില്ലാതാക്കാനുള്ള ധന ഉത്തരവാദിത്ത നിയമം പൂര്‍ണമായും നടപ്പാക്കാനാവില്ല. സാമ്പത്തിക മാന്ദ്യം നികുതിവരുമാനത്തെ ബാധിച്ചുവെന്നും ധനമന്ത്രി പറഞ്ഞു.
പ്രധാന ബജറ്റ് നിര്‍ദേശങ്ങള്‍:
നവീന മൂന്നാര്‍ നടാപ്പാക്കാന്‍ 20 കോടി
കാര്‍ഷിക മേഖലയ്ക്കുള്ള വിഹിതം 50 ശതമാനം ഉയര്‍ത്തി 622 കോടിയാക്കി. ഇതില്‍ 125 കോടി ഭക്‍ഷ്യ സുരക്ഷയ്ക്ക്.
നെല്‍കൃഷി വികസനത്തിന് 500 കോടി.
പച്ചക്കറി വികസനത്തിന് 100 കോടി.
വിദ്യാഭ്യാസ മേഖലയ്ക്ക് 316 കോടി. ഇതില്‍ 40 ശതമാനം സ്കൂള്‍ വിദ്യാഭ്യാസത്തിന്.
വിഴിഞ്ഞം പദ്ധതിയ്ക്ക് 125 കോടി.
മുല്ലപ്പെരിയാര്‍ പുതിയ ഡാമിന്‍റെ പഠനത്തിന് 10 കോടി.
എല്‍ എന്‍ ജി ടെര്‍മിനല്‍ 2012ല്‍ കമ്മീഷന്‍ ചെയ്യും.
മലയോര്‍ അഹൈവേ നിര്‍മാണം ഈ വര്‍ഷം തുടങ്ങും.
ജീവനക്കാരുടെ ആനുകൂല്യം വെട്ടിക്കുറയ്ക്കില്ല.
വിഴിഞ്ഞം പദ്ധതിയ്ക്കായി ആഗോള ടെന്‍ഡര്‍ വിളിക്കും.
ഒരു വര്‍ഷത്തിനകം കര്‍ഷകര്‍ക്ക് കിസാന്‍ ക്രെഡിറ്റ് കാര്‍ഡ്.
ദേശീയ തൊഴിലുറപ്പ് പദ്ധതി നഗരങ്ങളിലേക്ക് വ്യാപിപ്പിക്കും.
മത്സ്യമേഖലയുടെ അടങ്കല്‍ 50 കോടിയില്‍ നിന്ന് 75 കോടിയാക്കി.
കെട്ടിട നിര്‍മാണത്തിന് സ്റ്റാമ്പ് ഡ്യൂട്ടി ഇളവ്.
രണ്ട് വര്‍ഷം കൊണ്ട് 10 കോടി മരം നടും.ഇതിനായി 100 കോടി ചെലവ് പ്രതീക്ഷിക്കുന്നു.
