മോട്ടോ ജി 2ന് ഒറ്റയടിക്ക് മൂവായിരം രുപ വെട്ടിക്കുറച്ച് മൊബൈല്‍ വിപണിയെ ഞെട്ടിച്ചിരിക്കുകയാണ് മോട്ടൊറോള ഇപ്പോള്‍. ഔദ്യോഗിക ഫേസ്ബുക്ക് പേജു വഴി സർപ്രൈസായി തന്നെയാണ് വിലക്കുറവിന്റെ കാര്യം മോട്ടറോള ലോകത്തെയാകെ അറിയിച്ചത്. വില വെര്‍ട്ടിക്കുറച്ചതോടെ നേരത്തെ 12,999 രൂപയ്ക്കു ലഭിച്ചിരുന്ന ഫോൺ ഇപ്പോൾ 9,999 രൂപയ്ക്ക് ഫ്ലിപ്കാർട്ട് വഴി ലഭിക്കും. മോട്ടോ ജിയുടെ മൂന്നാം തലമുറ പുറത്തിറക്കുന്നതിന്റെ ഭാഗമായി പഴയ മോഡൽ വിറ്റഴിക്കുന്നതിനാണ് വില കുറച്ചതെന്നാണ് സൂചന.

ലോലിപോപ്പിലേക്ക് അപ്ഗ്രേഡ് ചെയ്യാവുന്ന മോട്ടോ ജി 2വിന് കോർണിംഗ് ഗൊറില്ലാ ഗ്ലാസോടു കൂടിയ 5 ഇഞ്ച് എച്ച്ഡി ഡിസ്പ്ലേ, 8 മെഗാപിക്സെൽ മെയിൻ ക്യാമറ, 2മെഗാപിക്സെൽ മുൻക്യാമറ, 2070mAh ബാറ്ററി എന്നിവയാണ് സവിശേഷതകള്‍.
ഫോണിന് 1ജിബി റാമാണുള്ളത്. 16ജിബി ഇൻബിൽട് സ്റ്റോറേജ് ഉള്ള ഫോണിന്റെ മെമ്മറി മൈക്രോ എസ്ഡി കാർഡു വഴി 32 ജിബി വരെ വർധിപ്പിക്കാം.

ഓട്ടോ ഫോക്കസ്, സ്ലോ മോഷൻ വീഡിയോ മോഡ്, എച്ചിഡിആർ, എൽ,ഇ.ഡി ഫ്ലാഷ് ലൈറ്റ് എന്നീ സൗകര്യങ്ങളോടു കൂടിയതാണ് പിൻക്യാമറ. വൈ-ഫൈ ഹോട്സ്പോട്, ബ്ലൂടൂത്ത്, ത്രീ-ജി, ജിപിഎസ് ഗ്ലോനാസ് എന്നിവ ഉൾപ്പെടുന്നതാണ് ഫോണിലെ കണക്ടിവിറ്റി സൗകര്യങ്ങൾ.