റസൂല്‍ പൂക്കുട്ടിയിലൂടെ മലയാളപ്പെരുമ ഹോളിവുഡിലും എത്തിയ വര്‍ഷമാണ് വിടപറയുന്നത്. ഒപ്പം മലയാളത്തിന്‍റെ പൂരപ്പെരുമ ലിംക ബുക്ക് ഓഫ് റെക്കോര്ഡ്സില് ഇടം നേടിയതും മലയാളിയുടെ സ്വകാര്യ അഹങ്കാരമാണ്. 2009 ന്‍റെ പ്രധാന പുരസ്കാരങ്ങളിലൂടെ ഒരു എത്തിനോട്ടം.
കേരളത്തിന് ഓസ്കര്‍ കൊല്ലം അഞ്ചല്‍ സ്വദേശിയായ റസുല്‍ പൂക്കുട്ടിക്ക് “സ്ലംഡോഗ് മില്യണയറി”ലെ ശബ്ദമിശ്രണത്തിനാണ് ഓസ്കര്‍ പുരസ്കാരം. ബോളിവുഡില്‍ വളരെ കുറച്ചു സിനിമകളിലൂടെ തന്നെ തന്‍റെ പ്രാഗത്ഭ്യം തെളിയിച്ച റസുല്‍ പൂക്കുട്ടി സ്ലംഡോഗ് മില്യണയറിലൂടെ ലോകസിനിമയുടെ ശ്രദ്ധാകേന്ദ്രമായി മാറുകയായിരുന്നു.
പൂരപ്പന്തല്‍ ലിംക ബുക്ക് ഓഫ് റെക്കോര്ഡ്സില് തൃശൂര്‍ പൂരത്തിനു തിരുവമ്പാടി വിഭാഗം നടുവിലാലില്‍ തീര്‍ത്ത അലങ്കാരപന്തല്‍ ലിംക ബുക്ക് ഓഫ് റെക്കോര്ഡ്സില് ഇടം നേടി. 2010ല്‍ പുറത്തിറങ്ങുന്ന ലിംക ബുക്കില്‍ ഹ്യൂമന്‍ സ്റ്റോറി വിഭാഗത്തിലായിരിക്കും പന്തലിന്‍റെ വിശദാംശങ്ങള്‍ പ്രസിദ്ധീകരിക്കുക. 10 ലക്ഷം രൂപ ചെലവിട്ടു നിര്‍മിച്ച പന്തലില്‍ പൂര്‍ണമായും എല്‍ഇഡി ബള്‍ബുകളായിരുന്നു ഉപയോഗിച്ചിരുന്നത്‌.
കേരള സംഗീത നാടക അക്കാദമി അവാര്‍ഡുകള്‍ കേരള സംഗീത നാടക അക്കാദമി അവാര്‍ഡുകള്‍ പ്രഖ്യാപിച്ചു. കോട്ടയ്‌ക്കല്‍ ശിവരാമന് കഥകളിക്കും കടയ്‌ക്കോട്‌ വിശ്വംഭരന് കഥാപ്രസംഗത്തിനും എം കെ അര്‍ജ്ജുനന് സംഗീതത്തിനും അക്കാദമി ഫെലോഷിപ്പുകള്‍ ലഭിച്ചു.
കേന്ദ്ര സംഗീത നാടക അക്കാദമി അവാര്‍ഡുകള്‍ കേന്ദ്ര സംഗീത നാടക അക്കാദമിയുടെ കഴിഞ്ഞ വര്‍ഷത്തെ അവാര്‍ഡുകള്‍ പ്രഖ്യാപിച്ചപ്പോള്‍ കേരള കലാരംഗത്തുനിന്നുള്ള മൂന്ന് പേര്‍ക്ക് പുരസ്കാരം. ബി ശശികുമാര്‍ (വയലിന്‍) കലാമണ്ഡലം കുട്ടന്‍ (കഥകളി) കലാമണ്ഡലം ലീലാമ്മ (മോഹിനിയാട്ടം) എന്നിവരെയാണ് സംഗീത നാടക അക്കാദമി അവാര്‍ഡ് നല്‍‌കി ആദരിച്ചത്.
