മദിരാശിപ്പഴമയും മലയാളസിനിമയും

സ്ക്രിപ്റ്റ് - പ്രദീപ് ആനക്കൂട്, ബിജു ഗോപിനാഥന്‍, മനോജ് വാഴമല, ബെന്നി ഫ്രാന്‍സീസ്,ക്യാമറ - ഗോപകുമാര്‍

FILEFILE
ജെമിനി ഫ്ലൈഓവറില്‍ നിന്ന് നുങ്കമ്പാക്കം പോവുന്ന വഴിയില്‍ ഇടതുവശത്തേക്കുള്ള ആദ്യ തിരിവിന് പൌരുഷഭാവമാണുള്ളത്. മലയാള സിനിമയില്‍ പുരുഷസൌന്ദര്യത്തിന്‍റെ പ്രതീകമായി വാഴ്ത്തപ്പെടുന്ന ഒരുതാരവുമായി ബന്ധപ്പെടുത്തുമ്പോഴാണ് ഈ റോഡിന് പൌരുഷഭാവം ലഭിക്കുന്നത്. ആരാണാ താരം, എന്താണാ ബന്ധം?
-കട്ട്-

സീന്‍ - ആറ്‌
ഹോട്ടല്‍ പാംഗ്രോവ്
പകല്‍

മദിരാശിപ്പട്ടണത്തിന്‍റെ പഴയ പൊലിമയുടെ ഓര്‍മ്മകളുമായി പുതിയ രുചികള്‍ക്ക് ജീവന്‍ നല്‍കുന്ന പാം‌ഗ്രൂവ് ഹോട്ടല്‍. മലയാളത്തിന്‍റെ ആദ്യത്തെ ആക്ഷന്‍ ഹീറോ ജയന്‍ ചെന്നൈയില്‍ ഉണ്ടെങ്കില്‍ സ്ഥിരമായി തങ്ങിയിരുന്നത് ഈ ഹോട്ടലില്‍ ആയിരുന്നു. പാം‌ഗ്രൂവ് ഹോട്ടല്‍ അക്കാലത്തെ പല സിനിമാപ്രവര്‍ത്തകരുടെയും ഇഷ്ട സ്ഥലമായിരുന്നു. പലര്‍ക്കും ഇവിടെ സ്ഥിരം മുറികള്‍ ഉണ്ടായിരുന്നു. (സിനിമാജീവിതത്തിന്‍റെ ആദ്യകാലത്ത് നാലരവര്‍ഷക്കാലത്തോളം പാം‌ഗ്രൂവ് ഹോട്ടലിലെ റൂം നമ്പര്‍ 504 ലാണ് താമസിച്ചതെന്ന് അടുത്തിടെ പ്രിയദര്‍ശന്‍ വെളിപ്പെടുത്തുകയുണ്ടായി.)

FILEFILE
1940ല്‍ കൊല്ലത്ത് ജനിച്ച കൃഷ്ണന്‍ നായരാണ് പിന്നീട് ജയന്‍ എന്ന പേരില്‍ സിനിമയിലെത്തിയത്. മലയാളത്തിന്‍റെ ആക്ഷന്‍ സിനിമാ സങ്കല്‍പ്പങ്ങളെ അട്ടിമറിച്ച നടനാണ് ജയന്‍‍. നേവി ഓഫീസറായിരിക്കേയാണ് സിനിമ സ്വപ്നങ്ങളിലേക്ക് ജയന്‍ ചേക്കേറുന്നത്. ചെറിയ ചെറിയ വേഷങ്ങളിലൂടെ തുടങ്ങിയ ജയന്‍ പിന്നീട് സിനിമാ സമവാക്യങ്ങള്‍ മാറ്റിയെഴുതി.

ജയന്‍ സ്ഥിരമായി താമസിച്ചിരുന്നത് റൂം നമ്പര്‍ 107 അല്ലെങ്കില്‍ 108ലാണ്. താമസിച്ചിരുന്ന മുറി മറ്റാര്‍ക്കും കൊടുക്കുന്നത് ജയന് ഇഷ്ടമായിരുന്നില്ല. മാസ വാടക നല്‍കി അദ്ദേഹം അത് സ്വന്തമാക്കി വച്ചിരിക്കുകയാരുന്നു എന്ന് പഴയ സിനിമ പ്രവര്‍ത്തകരില്‍ ചിലര്‍ ഓര്‍ക്കുന്നു. സിനിമയില്‍ നിന്ന് ഒന്നും സമ്പാദിക്കാത്ത ആളാണ് ജയന്‍. പാംഗ്രോവിലെത്തുമ്പോള്‍ ജയന്‍റെ കൈയില്‍ ഒരു സ്യൂട്ട്കേസ് ഉണ്ടായിരിക്കും. ഈ പണപ്പെട്ടി ഹോട്ടല്‍ വിടുമ്പോഴേക്കും കാലിയായിരിക്കും. ജീവിതം ആസ്വദിക്കാനുള്ളതാണ് എന്നായിരുന്നു ജയന്‍റെ തത്വശാസ്ത്രം.

സാഹസികതയോടുള്ള അതിപ്രണയമാണ് ജയനെ മരണത്തില്‍ എത്തിച്ചത്. കോളിളക്കം എന്ന ചിത്രത്തിന്‍റെ ക്ലൈമാക്സ് സീനിലെ സാഹസിക ചിത്രീകരണത്തിനിടെ ബാലന്‍സ് തെറ്റി തറയിലിടിച്ച ഹെലികോപ്റ്ററിന്‍റെ അടിയില്‍ പെടുകയായിരുന്നു ജയന്‍. മലയാള സിനിമ ഇന്നോളം കണ്ട പുരുഷസൌന്ദര്യത്തിന് ഉടമയായ ഈ താരത്തിന്‍റെ നെറ്റിയുടെ ഒരു ഭാഗവും ഒരു കണ്ണും സംഭവസ്ഥലത്ത് വെച്ചുതന്നെ തകര്‍ന്നിരുന്നു എന്ന് ദൃക്‌സാക്ഷികള്‍ പറയുന്നു.

ഷൂട്ടിംഗും കഴിഞ്ഞ് സ്യൂട്ട്‌കേസും തൂക്കി വരാറുള്ള ജയനെ പ്രതീക്ഷിച്ചുനിന്ന പാം‌ഗ്രൂവ് ഹോട്ടലിലെ ജീവനക്കാര്‍ക്ക് ജയന്‍റെ മരണവാര്‍ത്ത വിശ്വസിക്കാനായില്ല. അവര്‍ വാവിട്ടുകരഞ്ഞു.

ജീവിതാനന്ദങ്ങളില്‍ മുഴുകിനടന്നിരുന്ന ജയന് സ്വന്തമായി ബാങ്ക് അക്കൌണ്ട് ഉണ്ടായിരുന്നോ എന്നുതന്നെ ആര്‍ക്കും അറിയില്ല. ആവശ്യമുള്ള പണം സ്വന്തം കൈയില്‍ സൂക്ഷിക്കുന്നതായിരുന്നു പതിവ്. പഴയ സുഹൃത്തുക്കള്‍ ഓര്‍ക്കുന്നു. ജീവിതം ആനന്ദകരവും സാഹസികവുമായ ആഘോഷമാക്കിയ ജയന്‍റെ ഓര്‍മ്മകള്‍ പാം‌ഗ്രൂവില്‍ ഉണ്ടാകാം. പാം‌ഗ്രൂവിലെ ആ പഴയ ജയന്‍ മുറിക്ക് എത്രയെത്ര രഹസ്യങ്ങള്‍ പറയാന്‍ കാണും?

WEBDUNIA|
സീന്‍ അഞ്ച്
പകല്‍
യാത്രയിലാണ് നമ്മള്‍




ഇതിനെക്കുറിച്ച് കൂടുതല്‍ വായിക്കുക :