500, 1000 രൂപാ നോട്ടുകൾ പിൻവലിച്ച്​ പുതുതായി ഇറക്കിയ 2000 രൂപാ നോട്ടുകളുടെ അച്ചടിയും ഭാവിയിൽ നിർത്തിയേക്കുമെന്ന്​ യോഗ ഗുരു ബാബാ രാംദേവ്​. കള്ളനോട്ടുകൾ തടയുക എന്ന ലക്ഷ്യത്തോടെയാണല്ലോ രാജ്യത്തെ നോട്ടുകൾ പെട്ടന്നൊരു ദിവസം പിൻവലിച്ചത്. എന്നാൽ നോട്ട്​ നിരോധത്തിന്​ ശേഷവും​ വൻ തോതിൽ വ്യാജ കറൻസികൾ മാർക്കറ്റിലെത്തുന്നുണ്ടെന്ന് രാം ദേവ് പറഞ്ഞു.

മോദി പിൻവലിച്ച നോട്ടുകൾ പോലെ തന്നെ വലിയ മൂല്യമുള്ള 2000 രൂപ നോട്ടുകൾക്കും വ്യാജനിറങ്ങുന്നുണ്ട്​.

പുതിയ നോട്ടുകളുടെ വ്യാജൻ അച്ചടിക്കാനും വിതരണം ചെയ്യാനുമെല്ലാം യോജിച്ച സഹചര്യമാണിത്​. കള്ളനോട്ട് ഏത് നല്ല നോട്ട് ഏത് ഇപ്പോൾ തിരിച്ചറിയാൻ ബുദ്ധിമുട്ടാണ്​. അതിനാൽ ഭാവിയിൽ 2000 രൂപ നോട്ടുകളുടെ അച്ചടി നിർത്തുന്നതാണ്​ നല്ലത്​– ബാബാ രാംദേവ്​ മാധ്യമപ്രവർത്തകരോട്​ പറഞ്ഞു.

രാജ്യത്ത്​ കള്ളപ്പണം കറൻസി രൂപത്തിനു പുറമെ ഭൂമി, സ്വർണം ഖനി, ആരോഗ്യം, വിദ്യാഭ്യാസം തുടങ്ങിയ മേഖലകളിലായി കിടക്കുകയാണ്​. ഘട്ടമായി കള്ളപ്പണം ഇല്ലാതാക്കാൻ മോദി സർക്കാർ ശ്രമിക്കുമെന്നാണ്​ ​പ്രതീക്ഷിക്കുന്നത്. പ്രധാനമന്ത്രി രാജ്യനന്മക്ക്​ വേണ്ടിയാണ്​ ശക്തമായ നിലപാട്​ എടുത്തിരിക്കുന്നത്​. എന്നാൽ നല്ല ദിനങ്ങൾക്ക്​ വേണ്ടി സർക്കാറിനെയോ ​രാഷ്​ട്രീയക്കാരെയോ
പാർട്ടികളെയോ ആശ്രയിക്കുന്നത്​. സർക്കാറും സമൂഹവും ഒരുമിച്ച്​ പ്രവർത്തിച്ചാൽ മാത്രമേ രാജ്യത്ത്​ സമൃദ്ധിയും നല്ല ദിനങ്ങളും കൊണ്ടുവരാൻ കഴിയുയെന്നും രാംദേവ്​ അഭിപ്രായപ്പെട്ടു.