നോട്ടുകള്‍ നിരോധിച്ചതും ജിഎസ്ടിയും പ്രതീക്ഷിച്ച ഫലം കണ്ടിട്ടില്ലെന്ന കാര്യം പരോക്ഷമായി സമ്മതിച്ച് പ്രധാനമന്ത്രി നരേന്ദ്ര മോദി. ഈ രണ്ട് കാര്യങ്ങള്‍കൊണ്ടുമാത്രം സര്‍ക്കാരിനെയോ തന്നേയോ പഴിക്കേണ്ട കാര്യമില്ലെന്നും സീ ന്യൂസ് ചാനലിന് നല്‍കിയ അഭിമുഖത്തില്‍ മോദി വ്യക്തമാക്കി.

പല കാര്യങ്ങളിലും രാജ്യം നടത്തിയ പ്രകടനം ലോകത്തിന്റെ ശ്രദ്ധ നേടുന്നതിനും റേറ്റിങ് ഏജന്‍സികളുടെ റേറ്റിങ് കൂട്ടാനും സഹായകമായിട്ടുണ്ടെന്നും അദ്ദേഹം അഭിമുഖത്തില്‍ പഞ്ഞു. ഈ സര്‍ക്കാര്‍ രാജ്യത്തിന് ശൗചാലയം നിര്‍മ്മിച്ച് നല്‍കിയെന്നും സാമ്പത്തിക പരിഷ്‌കരണങ്ങള്‍ നടത്തിയെന്നും മോദി അഭിമുഖത്തില്‍ അഭിപ്രായപ്പെട്ടു.

ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവുമായി നടത്തിയ കൂടിക്കാഴ്ചയെക്കുറിച്ചും മോദി മാധ്യമപ്രവര്‍ത്തകരോട് സംസാരിച്ചിരുന്നു. ലോകത്താകമാനം സുഹൃത്തുകളെ സൃഷ്ടിക്കാനാണ് താന്‍ ആഗ്രഹിക്കുന്നതെന്നും മോദി മാധ്യമങ്ങളോട് വ്യക്തമാക്കി.