ജമ്മു|
vishnu|
Last Updated:
ബുധന്‍, 7 ജനുവരി 2015 (08:58 IST)
അതിര്‍ത്തിയില്‍ സംഘര്‍ഷം നില്‍ക്കുന്നതിനിടെ ഇരു രാജ്യങ്ങളിലെയും സൈനിക ഉദ്യോഗസ്ഥര്‍ തമ്മിലുള്ള ആശയ വിനിമയം നിലച്ചതായി റിപ്പോര്‍ട്ട്. ജനവരി ഒന്നിനാണ് ഇരുരാജ്യങ്ങളിലെയും
ഉന്നത സൈനിക ഉദ്യോഗസ്ഥര്‍തമ്മില്‍ അവസാനമായി സംഭാഷണം നടന്നത്. അതിനു ശേഷം ഇതുവറ്റ്രെ പാക്കിസ്ഥാന്റെ ഭാഗത്തു നിന്ന് യാതൊരു പ്രതികരണങ്ങളുമില്ല്. അഞ്ചു ദിവസമായി കാര്യങ്ങള്‍ ഈ സ്ഥിതിയിലാണെന്നാണ് ബിഎസ്എഫ് ഡയറക്ടര്‍ ജനറല്‍ ഡി കെ പഥക് പറയുന്നത്.
അതിര്‍ത്തിയിലെ സംഘര്‍ഷാവസ്ഥ പരിഹരിക്കുന്നതിന് ഫ്ലാഗ് മീറ്റിങ് നടത്തുന്നതുമായി ബന്ധപ്പെട്ടാണ് നോഡല്‍ ഓഫീസര്‍മാര്‍ ചര്‍ച്ചനടത്തിയത്. സംഭാഷണം അഞ്ച് മിനിറ്റോളം നീണ്ടു. ഇതിനുശേഷം ആശയവിനിമയം ഉണ്ടായിട്ടില്ല. ജനവരി മൂന്നിന് വെടിനിര്‍ത്തല്‍ കരാര്‍ ലംഘിച്ചതിനെതിരെ
ഇന്ത്യ പ്രതിഷേധക്കുറിപ്പ് നല്‍കിയിരുന്നു. എന്നാല്‍ പാക് സൈനിക ഉദ്യോഗസ്ഥര്‍ ഇത് സ്വീകരിച്ചില്ല. ഇതേത്തുടര്‍ന്ന് വാഗാ അതിര്‍ത്തിവഴി കുറിപ്പ് കൈമാറി. എന്നാല്‍ ഇപ്പോള്‍ വാഗയിലൂടെയും ഇത് കൈപ്പറ്റാന്‍ അവര്‍ തയ്യാറാകുന്നില്ലെന്ന് പഥക് പറഞ്ഞു.
അതിര്‍ത്തിയില്‍ സമാധാനം ഉണ്ടാകേണ്ടതുണ്ട്. അത് തകര്‍ക്കുന്ന യാതൊരു നടപടിയും ഇന്ത്യയുടെ ഭാഗത്തു നിന്ന് ഉണ്ടാകില്ല. സാധാരണക്കാര്‍ക്കുനേരെ ആക്രമണം ഉണ്ടായ സാഹചര്യത്തിലാണ് തങ്ങള്‍ തിരിച്ച് വെടിവെച്ചത്. സമാധാനം തകര്‍ക്കാനുള്ള ശ്രമങ്ങളുണ്ടായാല്‍ വെറുതെയിരിക്കില്ലെന്നും അദ്ദേഹം മുന്നറിയിപ്പ് നല്‍കി.
