അഭിറാം മനോഹർ|
Last Modified ബുധന്‍, 23 ഒക്‌ടോബര്‍ 2024 (11:15 IST)
ബെംഗളുരുവില്‍ ദുരിതം വിതച്ച് കനത്ത മഴ. ഈസ്റ്റ് ബെംഗളുരുവിലെ ഹൊറമാവ് അഗാരയില്‍ നിര്‍മാണത്തിലിരിക്കുന്ന കെട്ടിടം തകര്‍ന്ന് 5 പേര്‍ മരിച്ചു. കെട്ടിടാവശിഷ്ടങ്ങള്‍ക്കിടയില്‍ കുടുങ്ങിയ 13 പേരെ രക്ഷപ്പെടുത്തിയതായാണ് റിപ്പോര്‍ട്ടുകള്‍. കൂടുതല്‍ ആളുകള്‍ അവിടെ കുടുങ്ങികിടക്കുന്നതായാണ് റിപ്പോര്‍ട്ടുകള്‍. ഇവരെ കണ്ടെത്താന്‍ ഡോഗ് സ്‌ക്വാഡ് ഉള്‍പ്പടെയെത്തി തിരച്ചിലിലാണ്. കര്‍ണാടക ഉപമുഖ്യമന്ത്രി ഡി കെ ശിവകുമാര്‍ അപകടസ്ഥലം സന്ദര്‍ശിച്ചു.
കനത്ത മഴ നഗരത്തിലെ ജനജീവിതത്തെ സാരമായി ബാധിച്ചു. ദേവനഹള്ളി,കോറമംഗല,യെലഹങ്ക,ഹെബ്ബാള്‍,എച്ച് എസ് ആര്‍ ലേ ഔട്ട്, ആര്‍ ആര്‍ നഗര്‍, വസന്ത നഗര്‍, സഹകര്‍ നഗര്‍ എന്നിവിടെയെല്ലാം മഴ അതിരൂക്ഷമായിരുന്നു. കനത്ത മഴ തുടരുന്നതിനാല്‍ ബുധനാഴ്ച ബെംഗളുരുവിലെ സ്‌കൂളുകള്‍ക്ക് അവധി പ്രഖ്യാപിച്ചു. അതേസമയം കോളേജുകള്‍ പ്രവര്‍ത്തിക്കുമെന്ന് അര്‍ബന്‍ ഡെപ്യൂട്ടി കമ്മീഷണര്‍ ജി ജഗദീശ ഇറക്കിയ ഉത്തരവില്‍ പറയുന്നു. മഴകാരണം തിങ്കളാഴ്ചയും ബെംഗളുരുവിലെ സ്‌കൂളുകള്‍ക്ക് അവധിയായിരുന്നു. തിങ്കളാഴ്ച രാത്രി കെമ്പഗൗഡ അന്താരാഷ്ട്ര വിമാനത്താവളത്തില്‍ കനത്ത മഴ കാരണം ഇരുപതിലേറെ വിമാനങ്ങള്‍ വൈകി. അഞ്ച് വിമാനങ്ങള്‍ ചെന്നൈയിലേക്ക് വഴിതിരിച്ചുവിട്ടു.
