പിറന്നുവീണ് ആറാം മിനിറ്റില്‍ നവജാതശിശുവിന് ആധാര്‍ നമ്പര്‍. മ​ഹാ​രാ​ഷ്ട്ര​യി​ലെ ഉ​സ്മാ​നാ​ബാ​ദ് ജി​ല്ല​യി​ലുള്ള ഒരു ആ​ശു​പ​ത്രി​യി​ല്‍ ജ​നി​ച്ച ഭാ​വ​ന സ​ന്തോ​ഷ് യാ​ദ​വ് എ​ന്ന കു​ഞ്ഞി​നാ​ണ് ആ​ധാ​റി​നാ​യി മാ​താ​പി​താ​ക്ക​ള്‍ ര​ജി​സ്റ്റ​ര്‍ ചെ​യ്ത​ത്.

ഞായറാഴ്ച ഉച്ചയ്ക്ക് 12.03നായിരുന്നു ഭാവന ജനിച്ചത്. കുഞ്ഞ് ജനിച്ചയുടന്‍ തന്നെ ആധാറിനായി മാതാപിതാക്കള്‍ ഓണ്‍ലൈനായി അപേക്ഷ നല്‍കി. തുടര്‍ന്ന് 12.09ന് കുഞ്ഞിന്റെ ഓണ്‍ലൈന്‍ ജനന സര്‍ട്ടിഫിക്കറ്റും ആധാറും സ്വന്തമാക്കാന്‍ കഴിഞ്ഞെന്ന് ജില്ലാ കലക്ടര്‍ രാധാകൃഷ്ണ ഗാമെ പറഞ്ഞു.

ഉസ്മാനാബാദിന് ഇത് അഭിമാനത്തിന്റെ നിമിഷമാണ്. ജനിച്ചുവീഴുന്ന ഓരോ കുട്ടികള്‍ക്കും ആധാറിനായി രജിസ്റ്റര്‍ ചെയ്യണമെന്നും അവരുടെ ആധാര്‍ നമ്പറുകള്‍ മാതാപിതാക്കളുടെ ആധാറുമായി ബന്ധിപ്പിക്കുമെന്നും കലക്ടര്‍ അറിയിച്ചു.