ബ്ലൂ വെയില്‍ ഗെയിമിന് അടിമപ്പെട്ട് ആത്മഹത്യ ചെയ്യാന്‍ ശ്രമിച്ച പെണ്‍കുട്ടിയെ പൊലീസും നാട്ടുകാരും ചേര്‍ന്ന് രക്ഷപെടുത്തി. ജോദ്‌പൂരില്‍ കഴിഞ്ഞ ദിവസമാണ് സംഭവം നടന്നത്. ടാസ്ക് പൂര്‍ത്തീകരിക്കാനാണ് താന്‍ വെള്ളത്തിലേക്ക് എടുത്ത് ചാടിയതെന്നും പെണ്‍കുട്ടി പൊലീസിനോട് പറഞ്ഞു.

താന്‍ ആത്മഹത്യ ചെയ്തില്ലെങ്കില്‍ തന്റെ അമ്മ മരിക്കുമെന്നാണ് പെണ്‍കുട്ടി പോലീസിനോട് പറഞ്ഞിരിക്കുന്നത്. വീട്ടില്‍നിന്ന് സാധനങ്ങൾ വാങ്ങുന്നതിനായി കടയിലേക്കെന്നു പറഞ്ഞാണ് പെണ്‍കുട്ടി പുറത്തിറങ്ങിയത്. എന്നാല്‍, മണിക്കൂറുകള്‍ കഴിഞ്ഞിട്ടും കാണാത്തതിനെ തുടര്‍ന്ന് നാട്ടുകാരും വീട്ടുകാരും അന്വേഷിച്ചിറങ്ങുകയായിരുന്നു.

വീട്ടുകാര്‍ അറിയിച്ചതിനെ തുടര്‍ന്ന് പൊലീസെത്തുകയും തുടര്‍ന്ന് നടത്തിയ അന്വേഷണത്തില്‍ തടാകത്തില്‍ നിന്നും പെണ്‍കുട്ടിയെ കണ്ടെത്തുകയുമായിരുന്നു. തുടര്‍ന്ന് നടന്ന ചോദ്യം ചെയ്യലിലാണ് പെണ്‍കുട്ടി ബ്ലൂവെയിലിന്റെ പിടിയിലാണെന്ന് മനസിലായത്.