കോഴിക്കോട് ജനരക്ഷായാത്ര എത്തിയപ്പോള്‍ സിപി‌എം സംസ്ഥാന സെക്രട്ടറി കോടിയേരി ബാലകൃഷ്ണന്‍ സഞ്ചരിച്ചത് സ്വര്‍ണക്കടത്ത് കേസ് പ്രതി ഫൈസല്‍ കാരാട്ടിന്റെ വാഹനമാണെന്ന ആരോപണവുമായി ബിജെപിയും ലീഗും കഴിഞ്ഞ ദിവസം രംഗത്തെത്തിയിരുന്നു. എന്നാല്‍ സുരേന്ദ്രന്‍ പറയുന്നതു പോലെ താന്‍ സ്വര്‍ണക്കടത്ത് കേസിലെ പ്രതിയല്ലെന്നാണ് ഫൈസല്‍ കാരാട്ട് നല്‍കുന്ന വിശദീകരണം.

‘കൊടിയേരി ബാലകൃഷ്ണന്റെ നേതൃത്വത്തില്‍ കൊടുവള്ളിയില്‍ നടന്ന എല്‍ഡിഎഫ് ജനജാഗ്രതാ യാത്രയില്‍ എന്റെ കാറ് സ്വീകരണത്തിന് ഉപയോഗപ്പെടുത്തിയതുമായി ബന്ധപ്പെട്ട് ബിജെപി നേതാവ് കെ സുരേന്ദ്രന്‍ സോഷ്യല്‍ മീഡിയയില്‍ വസ്തുതാ വിരുദ്ധവും അടിസ്ഥാന രഹിതവുമായ ഒരു പോസ്റ്റിട്ടതായി ശ്രദ്ധയില്‍പ്പെട്ടെന്ന്
ഫൈസല്‍ പറയുന്നു.

വസ്തുതകള്‍ മനസ്സിലാക്കാതെ തനിക്കെതിരെ പോസ്റ്റിട്ട സുരേന്ദ്രന്‍ പറഞ്ഞ കാര്യങ്ങളില്‍ കൂടുതലും അദ്ദേഹത്തിന്റെ വിവരക്കേടാണ് വ്യക്തമാക്കുന്നതെന്നും ആരെങ്കിലും ചര്‍ദ്ദിച്ചത് സ്വാദോടെ വിഴുങ്ങുകയും സോഷ്യല്‍ മീഡിയയില്‍ തുപ്പുകയും ചെയ്യുന്നതിന് മുമ്പ് സുരേന്ദ്രന് കാര്യത്തെ കുറിച്ച് ഒരു അന്വേഷണം നടത്താമായിരുന്നുവെന്നും ഫൈസല്‍ പറഞ്ഞു.