മദ്യലഹരിയില്‍ മൂക്ക് കടിച്ചെടുത്ത യുവാവിനെ കട്ടിലിനടിയില്‍ നിന്നും പിടികൂടി
ഗുരുവായൂര്|
WEBDUNIA|
Last Modified വ്യാഴം, 8 ഓഗസ്റ്റ് 2013 (14:47 IST)
PRO
മദ്യലഹരിയില്‍ മറ്റൊരാളുടെ മൂക്ക് കടിച്ചെടുത്ത സംഭവത്തില്‍ ഒളിവിലായിരുന്ന യുവാവിനെ ഗുരുവായൂര് എസ്‌ ഐ ടി ജി ദിലീപിന്റെ നേതൃത്വത്തില്‍ അറസ്റ്റു ചെയ്തു.
കൊല്ലം തഴവ സ്വദേശി രതീഷ്കുമാറിനെയാണ്‌ (31) അറസ്റ്റു ചെയ്തത്‌. ഓച്ചിറ കൊച്ചുമുറി ശ്രീശൈലത്തില്‍ ഹരിലാലിന്റെ മൂക്കാണ്‌ ഇയാള്‍ കടിച്ചുപറിച്ചത്‌.
ഇരുവരും ഒരുമിച്ച്‌ താമസിച്ചിരുന്ന ഗുരുവായൂരില്‍ നിര്‍മാണത്തിലിരിക്കുന്ന ശ്രീവത്സം അനക്സിലെ മുറിയില്‍വച്ചു വാക്കുതര്‍ക്കമുണ്ടാകുകയും രതീഷ്കുമാര്‍ ഹരിലാലിന്റെ മൂക്ക് കടിച്ചെടുക്കുകയുമായിരുന്നു.
മൂക്കിന്റെ ഒരുഭാഗം മുറിഞ്ഞുപോയ ഹരിലാല്‍ മെഡിക്കല്‍ കോളജില്‍ ചികിത്സയിലാണ്‌.ഗുരുവായൂര് ദേവസ്വം പുതുതായി നിര്‍മിക്കുന്ന ശ്രീവത്സം അനക്സിന്റെ നിര്‍മാണ തൊഴിലാളികളായിരുന്നു ഇരുവരും.
കഴിഞ്ഞദിവസം രാത്രി എസ്‌ഐയുടെ നേതൃത്വത്തിലുള്ള പോലീസ്‌ കരുനാഗപ്പിള്ളിയിലെ വീട്ടിലെത്തി കട്ടിലിനടിയില്‍നിന്നാണ്‌ പ്രതിയെ പിടികൂടിയത്‌. സീനിയര്‍ സിപിഒ പിഎ. സനില്‍, സിപിഒമാരായ അഖില്‍, അജീഷ്‌ എന്നിവരും പോലീസ്‌ സംഘത്തില്‍ ഉണ്ടായിരുന്നു.
