നിയമസഭാ തെരഞ്ഞെടുപ്പില്‍ എ ഐ എ ഡി എം കെയുടെ സ്ഥാനാര്‍ത്ഥിയായി തിരുവനന്തപുരത്ത് ബിജു രമേശ് മത്സരിക്കും. എ ഐ എ ഡി എം കെ ജനറല്‍ സെക്രട്ടറി ജയലളിതയാണ് ബിജു രമേശിനെ സ്ഥാനാര്‍ത്ഥിയായി പ്രഖ്യാപിച്ചത്. തിരുവനന്തപുരത്ത് ആന്റണി രാജുവാണ് ഇടത് സ്ഥാനാര്‍ത്ഥി. യു ഡി എഫി‌നു വേണ്ടി വി എസ് ശിവകുമാറും ബി ജെ പിക്കു വേണ്ടി എസ് ശ്രീശാന്തും മണ്ഡലത്തില്‍ മത്സരരംഗത്തുണ്ട്.

എ ഐ എഡി എം കെയുടെ രീതിയനുസരിച്ച് സ്ഥാനാര്‍ത്ഥിയായി മത്സരിക്കുന്ന ആള്‍ കേന്ദ്ര കമ്മിറ്റിക്ക് അപേക്ഷ നല്‍കണം. ഇത്തരത്തില്‍ ബിജു നേരത്തെ അപേക്ഷ നല്‍കിയിരുന്നു. എ ഐ എ ഡി എം കെ കഴിഞ്ഞ ദിവസം മൂന്നാറില്‍ സംഘടിപ്പിച്ച പരിപാടിയിലും ബിജു രമേശ് പങ്കെടുത്തിരുന്നു. ബാര്‍ കോഴക്കേസില്‍ ബിജുവെടുത്ത നിലപാടുകള്‍ വോട്ടായി മാറുമെന്നും ഇത് കേരളത്തില്‍ പാര്‍ട്ടിക്ക് ഗുണമാകുമെന്നാണ് എ ഐ എ ഡി എം കെയുടെ വിലയിരുത്തല്‍. കേരളത്തിലെ ഏഴു സീറ്റുകളിലാകും അണ്ണാ ഡി എം കെ മത്സരിക്കുക. തിരുവനന്തപുരത്തിനു പുറമെ കഴിഞ്ഞ തവണ മത്സരിച്ച ആറു നിയമസഭാ മണ്ഡലങ്ങളിലും അണ്ണാ ഡി എം കെ മത്സരിക്കും.