സംസ്ഥാനത്തെ ഒന്‍പത് ജില്ലകളിലെ വിവിധ തദ്ദേശസ്വയംഭരണ സ്ഥാപനങ്ങളിലേക്കായി നടന്ന ഉപതെരഞ്ഞെടുപ്പില്‍ ഇടതുമുന്നണിക്ക് വന്‍ തിരിച്ചടി. മൊത്തം 26 സീറ്റുകളിലേക്ക് നടന്ന ഉപതെരഞ്ഞെടുപ്പില്‍ ആറ് സീറ്റുകള്‍ മാത്രമാണ് ഇടതുമുന്നണിക്ക് ലഭിച്ചത്. നിലവിലുണ്ടായിരുന്ന എട്ടു സീറ്റുകളാണ് ഇടതുമുന്നണിക്ക് നഷ്‌ടമായത്.
ഉപതെരഞ്ഞെടുപ്പില്‍ യു ഡി എഫിന് 19 സീറ്റുകള്‍ ലഭിച്ചു. ഇതില്‍ ഏഴു സീറ്റുകളും ഇടതുമുന്നണിയില്‍ നിന്നും പിടിച്ചെടുത്തതാണ്. അതേസമയം, യു ഡി എഫിന് നിലവിലുണ്ടായിരുന്ന രണ്ട് സീറ്റുകള്‍ നഷ്‌ടപ്പെടുകയും ചെയ്തു. തെരഞ്ഞെടുപ്പില്‍ ബി ജെ പിക്ക് ഒരു സീറ്റ് ലഭിച്ചിട്ടുണ്ട്.
തിരുവനന്തപുരം വിഴിഞ്ഞം പഞ്ചായത്തിലെ കോവളം വാര്‍ഡില്‍ യു ഡി എഫ് സ്വതന്ത്ര സ്ഥാനാര്‍ത്ഥി എല് സുഗതന്‍ 121 വോട്ടുകള്‍ക്ക് വിജയിച്ചു. ഇതോടെ, പഞ്ചായത്തില്‍ ഭരണമാറ്റം ഉണ്ടാകില്ലെന്ന് ഉറപ്പായി.
ആലപ്പുഴ ജില്ലയിലെ വെണ്‍മണി പഞ്ചായത്ത്‌ പത്താം വാര്‍ഡിലും യു ഡി എഫ് വിജയിച്ചു. കേരള കോണ്‍ഗ്രസ്‌ എമ്മിലെ ബി വര്ഗീസ് 95 വോട്ടുകളുടെ ഭൂരിപക്ഷത്തിനാണ് വിജയിച്ചത്. സി പി എം സ്വതന്ത്രനെയാണ് വര്ഗീസ് തോല്പിച്ചത്.
പാലക്കാട്‌ ജില്ലയില്‍ നടന്ന ഉപതിരഞ്ഞെടുപ്പില്‍ രണ്ടിടത്ത്‌ യു ഡി എഫ് വിജയം കണ്ടു. പാലക്കാട്‌ നഗരസഭയിലെ കുന്നത്തൂര്‍മേട്‌ യു ഡി എഫ് പിടിച്ചെടുത്തു. 379 വോട്ടിന്‍റെ ഭൂരിപക്ഷത്തിലാണ് ഇവിടെ യു ഡി എഫ് സ്ഥാനാര്‍ത്ഥിയായ ഡി വനരാജന്‍ വിജയിച്ചത്. പാലക്കാട്‌ കരിമ്പുഴ പഞ്ചായത്തിലെ കാവുണ്ട വാര്‍ഡും യു ഡി എഫ് പിടിച്ചെടുത്തു
കോഴിക്കോട്‌ കാരശേരി വല്ലാത്തയ്പാറ വാര്‍ഡ്‌ സി പി എം നിലനിര്‍ത്തി. സി പി എമ്മിലെ പി വിശ്വനാഥ്‌ 402 വോട്ടിന്‍റെ ഭൂരിപക്ഷത്തിനാണ് വിജയിച്ചത്.
മലപ്പുറത്ത് വോട്ടെടുപ്പ്‌ നടന്ന ആറിടത്തും യു ഡി എഫ് മുന്നണി വിജയിച്ചു. പൊന്നാനി നഗരസഭയിലെ മെയിലാഞ്ചിക്കാട്‌ ഡിവിഷന്‍ മുസ്‌ലിം ലീഗ്‌ നിലനിര്‍ത്തി. 418 വോട്ടുകളുടെ ഭൂരിപക്ഷത്തില്‍ വി ശശിധരനാണ്‌ ജയിച്ചത്‌.
