പിടിച്ചെടുത്ത 1000 ലിറ്റര്‍ സ്പിരിറ്റ് കൊണ്ട് എക്സൈസ് ചെയ്തത്
കഴിഞ്ഞ ഓണക്കാലത്ത് എക്സൈസ് സ്‌പെഷല്‍ ഡ്രൈവിന്റെ ഭാഗമായി തൃശൂരില്‍ നിന്ന് പിടികൂടിയത് 1000 ലിറ്റര്‍ സ്പിരിറ്റാണ്. ഈ സ്പിരിറ്റ് നശിപ്പിച്ചുകളയുന്നതിനു പകരം എക്സൈസ് ചെയ്തത് എന്താണെന്നോ? പിടിച്ചെടുത്ത 1000 ലിറ്റര്‍ സ്പിരിറ്റ് 1240 ലിറ്റര്‍ സാനിറ്റൈസറാക്കി മാറ്റി. ശേഷം ജില്ലയിലെ പ്രധാന ആശുപത്രികളിലേക്കും ആരോഗ്യകേന്ദ്രങ്ങളിലേക്കും സൗജന്യമായി എത്തിച്ചുനല്‍കി.
സാനിറ്റൈസര്‍ വിതരണത്തിനായി ജില്ലാ കലക്ടര്‍ എസ്.ഷാനവാസ് ഡെപ്യൂട്ടി ഡി.എം.ഒ. കെ.എന്‍.സതീഷിന് കൈമാറി.
എന്‍ഫോഴ്സ്മെന്റ് പ്രവര്‍ത്തനത്തിനിടെയാണ് എക്സൈസ് 1000 ലിറ്റര്‍ സ്പിരിറ്റ് പിടികൂടിയത്. തുടര്‍ന്ന് കോടതി നടപടികള്‍ക്ക് ശേഷം ജില്ലാ ഭരണകൂടത്തിന്റെ ശുപാര്‍ശയില്‍ എക്സൈസ് കമ്മീഷണര്‍ ഈ 1000 ലിറ്റര്‍ സ്പിരിറ്റ് സാനിറ്റൈസര്‍ ആക്കാന്‍ നിര്‍ദേശിക്കുകയായിരുന്നു. കുട്ടനെല്ലൂരിലെ സ്വകാര്യ ഫാര്‍മസ്യൂട്ടിക്കലിന്റെ സഹായത്തോടെയാണ് സ്പിരിറ്റിനെ 1240 ലിറ്റര്‍ സാനിറ്റൈസറാക്കി മാറ്റിയത്.
