താൻ ഇല്ലാത്തപ്പോഴും പലതവണ സ്വപ്ന സുരേഷും സരിത്തും സെക്രട്ടേറിയറ്റിൽ വന്നിട്ടുണ്ട് എന്ന ശിവശങ്കറിന്റെ മൊഴിയുടെ അടിസ്ഥാനത്തിൽ ഇനി അന്വേഷണം മുന്നോട്ടുകൊണ്ടുപോകണം എങ്കിൽ സെക്രട്ടേറിറ്റിലെ സിസിടിവി ദൃശ്യങ്ങൾ ലഭിച്ചേ മതിയാകു എന്ന് അന്വേഷണ ഏജൻസികൾ. ഇതുസംബന്ധിച്ച് അന്വേഷണ ഏജൻസികൾ ഉന്നത ഉദ്യോഗസ്ഥർക്ക് റിപ്പോർട്ട് നൽകി.

കഴിഞ്ഞ ദിവസം നടന്ന വീഡിയോ കോൺഫറൻസിങ് അവലോകന യോഗത്തിൽ, ദേശിയ അന്വേഷണ ഏജൻസിയും കസ്റ്റംസും സിസിടിവി ദൃശ്യങ്ങൾ പരിശോധിച്ചാലെ ഇനി അന്വേഷണം മുന്നോട്ടുകൊണ്ടുപോകാനാകു എന്ന് വ്യക്തമാക്കിയത്, താന്‍ ഇല്ലാത്ത ദിവസങ്ങളിലും സ്വപ്‌നയും സരിത്തും പലതവണ സെക്രട്ടേറിയറ്റില്‍ എത്തിയിട്ടുണ്ടെന്നും എന്നാൽ എന്തിനാണ് അവർ എത്തിയത് എന്ന് അറിയില്ലെന്നുമാണ് ശിവശങ്കർ മൊഴി നൽകിയിരിയ്ക്കുന്നത്.

പ്രതികളുടെ ഫോണ്‍ രേഖകള്‍ പരിശോധിച്ച അന്വേഷണ സംഘം ഇക്കാര്യം സ്ഥിരീകരിയ്ക്കുകയും ചെയ്തിട്ടുണ്ട് എന്നാണ് വിവരം. എന്നാൽ സെക്രട്ടേറിയറ്റിൽ ശിവശങ്കറുമായി മാത്രമാണ് തങ്ങൾക്ക് വ്യക്തിബന്ധമുള്ളത് എന്നാണ് പ്രതികളുടെ മൊഴി. ദൃശ്യങ്ങളുടെ അടിസ്ഥാനത്തിലുള്ള ചോദ്യം ചെയ്യലിൽ മാത്രമേ മൊഴികളിലെ വസ്തുത വ്യക്തമാകു എന്നും അന്വേഷണ ഏജൻസികൾ വ്യക്തമാക്കുന്നു