എറണാകുളം: താത്കാലിക ജീവനക്കാരനായ ഭർത്താവിനെ ജോലിയിൽ നിന്ന്
പിരിച്ചുവിട്ടതിൽ മനം നൊന്ത് അയാളുടെ ഭാര്യ ആത്മഹത്യ ചെയ്തു. കോലഞ്ചേരി കറുകപ്പള്ളി പുല്ലിട്ട മൂലയിൽ സുരേന്ദ്രന്റെ ഭാര്യ സിന്ധു (45) ആണ് കിണറ്റിൽ ചാടി ജീവനൊടുക്കിയത്.

കോലഞ്ചേരി ചൂണ്ടിയിലെ വാട്ടർ അതോറിറ്റി വകുപ്പിൽ കഴിഞ്ഞ പത്ത് വര്ഷങ്ങളായി സുരേന്ദ്രൻ താത്കാലിക ജീവനക്കാരനായിരുന്നു. എന്നാൽ അടുത്തിടെ വകുപ്പ് മന്ത്രി മാറിയതോടെ പ്രാദേശിക നേതാക്കൾ ഇടപെട്ടു സുരേന്ദ്രനെ ജോലിയിൽ നിന്ന് മാറ്റിയിരുന്നു എന്നാണ് വിവരം. ആഴ്ചവേതനമായി 450 രൂപ ലഭിച്ചിരുന്ന ജോലി ഇല്ലാതായതോടെ കുടുംബം വിഷമത്തിലായി.

ഇതിനെ തുടർന്നാണ് കഴിഞ്ഞ പതിനെട്ടിന് രാവിലെ സുരേന്ദ്രന്റെ ഭാര്യ കിണറ്റിൽ ചാടിയത്. നാട്ടുകാരും വീട്ടുകാരും ചേർന്ന് സിന്ധുവിനെ കോലഞ്ചേരി മെഡിക്കൽ മിഷൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.