കെ.സുരേന്ദ്രനെ ന്യായീകരിക്കാനും സംരക്ഷിക്കാനും പറ്റില്ലെന്ന് വ്യക്തമാക്കി കൃഷ്ണദാസ്-ശോഭാ സുരേന്ദ്രന്‍ പക്ഷങ്ങള്‍. സുരേന്ദ്രനെ അധ്യക്ഷ സ്ഥാനത്തു നിന്ന് ഉടന്‍ നീക്കണമെന്ന് ഇരു പക്ഷവും ദേശീയ നേതൃത്വത്തോട് ആവശ്യപ്പെടുന്നു. കേരളത്തില്‍ പാര്‍ട്ടി വന്‍ പ്രതിസന്ധിയിലാണെന്ന് ഇരുപക്ഷവും ദേശീയ നേതൃത്വത്തെ കത്തിലൂടെ അറിയിച്ചു.

സുരേന്ദ്രനും മുരളീധരനും ചേര്‍ന്ന് പാര്‍ട്ടിയെ കുടുംബസ്വത്താക്കി. കേരളത്തില്‍ ബിജെപി പ്രതിസന്ധിയിലാണ്. ഇപ്പോഴുള്ള പ്രതിസന്ധി സുരേന്ദ്രന്‍ വ്യക്തിപരമായി സൃഷ്ടിച്ചതാണ്. തിരഞ്ഞെടുപ്പ് പ്രവര്‍ത്തനങ്ങളില്‍ പല നേതാക്കളെയും ഒഴിവാക്കി പ്രചാരണ സാമഗ്രികള്‍ വിതരണം ചെയ്യാനും സാമ്പത്തിക കാര്യങ്ങളിലും സുഹൃത്തുക്കളെയും കുടുംബാംഗങ്ങളെയുമാണ് സുരേന്ദ്രന്‍ നിയോഗിച്ചതെന്നും എതിര്‍ പക്ഷത്തുനിന്നുള്ള നേതാക്കള്‍ പരാതിപ്പെടുന്നു. കൃഷ്ണദാസ്-ശോഭ സുരേന്ദ്രന്‍ പക്ഷങ്ങള്‍ ഇക്കാര്യങ്ങളെല്ലാം കേന്ദ്ര നേതൃത്വത്തെ അറിയിച്ചിട്ടുണ്ട്.

സുരേന്ദ്രന്‍ ഇപ്പോള്‍ ഡല്‍ഹിയിലാണ്. കേരളത്തിലെ സാഹചര്യങ്ങള്‍ കേന്ദ്ര നേതൃത്വത്തെ അറിയിക്കാനാണ് സുരേന്ദ്രന്‍ ഡല്‍ഹിയില്‍ തുടരുന്നത്. സുരേന്ദ്രനെ അധ്യക്ഷ സ്ഥാനത്തുനിന്ന് മാറ്റാന്‍ കേന്ദ്ര നേതൃത്വവും ആലോചിക്കുന്നുണ്ട്. കേരളത്തില്‍ പാര്‍ട്ടി ഇത്ര വലിയ പ്രതിസന്ധിയിലേക്ക് പോയതില്‍ കേന്ദ്ര നേതൃത്വത്തിന് അതൃപ്തിയുണ്ട്.