പുതിയ വൈദ്യുതി കണക്ഷന്‍ നിരക്കുകള്‍ പരിഷ്‌കരിച്ചു; നിരക്കുകള്‍ ഒക്ടോബര്‍ 12 മുതല്‍ പ്രാബല്യത്തില്‍
തിരുവനന്തപുരം: പുതിയ വൈദ്യുതി കണക്ഷനുകള്‍ക്കുള്ള പുതുക്കിയ നിരക്കുകള്‍ ഒക്ടോബര്‍ 12 മുതല്‍ പ്രാബല്യത്തില്‍ വരും. കണക്റ്റഡ് ലോഡിനെ അടിസ്ഥാനമാക്കിയാണ് നിരക്കുകള്‍ നിശ്ചയിച്ചിരിക്കുന്നത്. കേരള സംസ്ഥാന വൈദ്യുതി റെഗുലേറ്ററി കമ്മീഷന്‍ ഇതുസംബന്ധിച്ച ഉത്തരവ് പുറപ്പെടുവിച്ചു. കണക്ഷന്‍ നല്‍കുന്നതിന് ആവശ്യമായ പോസ്റ്റുകളുടെയും മറ്റ് ഉപകരണങ്ങളുടെയും എണ്ണത്തെ അടിസ്ഥാനമാക്കിയായിരുന്നു ഇതുവരെ നിരക്കുകള്‍ നിശ്ചയിച്ചിരുന്നത്. എന്നാല്‍ പരിഷ്‌കരിച്ച സംവിധാനം ഈ കണക്കുകൂട്ടല്‍ രീതിയില്‍ മാറ്റം വരുത്തുന്നു.
2 kW വരെയുള്ള ഗാര്‍ഹിക കണക്ഷനുകള്‍ക്കുള്ള നിരക്ക് 2,000 രൂപയായി ഏകീകരിച്ചു. 30 kW വരെയുള്ള എല്‍.ടി. (LT) കണക്ഷനുകള്‍ക്ക്vഅധിക ട്രാന്‍സ്ഫോമറിനായി പ്രത്യേക എസ്റ്റിമേറ്റ് തയ്യാറാക്കേണ്ടതില്ല. 35 മീറ്റര്‍ സര്‍വീസ് വയര്‍ ഉള്‍പ്പെടെ നിലവിലുള്ള 11-kV, LT വിതരണ ശൃംഖലയുടെ 200 മീറ്റര്‍ പരിധിക്കുള്ളില്‍ സ്ഥിതി ചെയ്യുന്ന സ്ഥലങ്ങള്‍ക്ക് മാത്രമേ പുതുക്കിയ നിരക്കുകള്‍ ബാധകമാകൂ. 200 മീറ്ററില്‍ കൂടുതല്‍ അകലെയുള്ള സ്ഥലങ്ങളിലേക്കുള്ള കണക്ഷന്‍ നിരക്കുകള്‍ നിലവിലുള്ള രീതിയില്‍ത്തന്നെ കണക്കാക്കുന്നത് തുടരും. കണക്ഷന്‍ നല്‍കുന്നതിന് നിലവിലുള്ള ട്രാന്‍സ്ഫോര്‍മറിന്റെ ശേഷി വര്‍ദ്ധിപ്പിക്കുകയോ പുതിയ ട്രാന്‍സ്ഫോര്‍മര്‍ സ്ഥാപിക്കുകയോ ചെയ്യേണ്ടതുണ്ടെങ്കില്‍ അതിന്റെ ഉത്തരവാദിത്തം കേരള സ്റ്റേറ്റ് ഇലക്ട്രിസിറ്റി ബോര്‍ഡിനായിരിക്കും (KSEB).
