കൊല്ലം: മാതാവിന്റെ സഹോദരീ ഭർത്താവിൽ നിന്ന് ക്രൂരമായ രീതിയിൽ പീഡനം ഏറ്റ നാലര വയസുള്ള ബാലികയെ ശിശുക്ഷേമസമിതി പ്രവർത്തകർ എത്തി രക്ഷിച്ചു. ഇതുമായി ബന്ധപ്പെട്ടു കുട്ടിയുടെ മാതാവിന്റെ സഹോദരീ ഭർത്താവായ തമിഴ്‌നാട് സ്വദേശിയെ പോലീസ് അറസ്റ്റ് ചെയ്തു. കൊല്ലം ലക്ഷ്മിനടയ്ക്കടുത്ത് താമസിക്കുന്ന ഇയാൾ കുട്ടിയെ ആഭിചാര ക്രിയകൾക്ക് ഉപയോഗിച്ചിരുന്നു എന്നും സൂചനയുണ്ട്.

ഇവരുടെ വീട്ടിൽ നിന്ന് ദിവസവും കുട്ടിയുടെ കരച്ചിലും ബഹളവും കേക്കുന്നു എന്ന നാട്ടുകാരുടെ പരാതിയെ തുടർന്ന് എത്തിയ ആശാ വർക്കേഴ്‌സാണ് വിവരം ശിശുക്ഷേമ സമിതിയെ അറിയിച്ചത്. തുടർന്ന് നടത്തിയ പരിശോധനയിലാണ് ദേഹമാസകലം പരുക്കേറ്റ നിലയിൽ കുട്ടിയെ കണ്ടെത്തിയത്. തുടർന്ന് കുട്ടിയെ "തണൽ"രക്ഷാ കേന്ദ്രത്തിൽ എത്തിക്കുകയും ചെയ്തു.

കുട്ടിയുടെ മൊഴി രേഖപ്പെടുത്തുകയും ചെയ്തിട്ടുണ്ട്. കുട്ടിക്കൊപ്പം കുട്ടിയുടെ മാതാവ്, മൂത്ത സഹോദരിയായ ഏഴു വയസുകാരിയെയും മഹിളാ മന്ദിരത്തിൽ എത്തിച്ചു. മദ്യപാനിയായ ഇളയച്ഛൻ കുട്ടിയെ സ്ഥിരമായി ഉപദ്രവിക്കുമായിരുന്നു എന്നാണറിയുന്നത്.