പെരുമ്പാവൂരില്‍ ജിഷയുടെ മൃഗീയ കൊലപാതകത്തിന്റെ ഞെട്ടലില്‍ നില്‍ക്കുന്ന കേരളം ഇന്നലെ മറ്റൊരു ഹീനകൃത്യത്തിന് സാക്ഷ്യം വഹിച്ചു. ഇതരസംസ്ഥാന തൊഴിലാളിയായ യുവാവിനെ പൊരിവെയിലത്ത് കെട്ടിയിട്ട് കൊലപ്പെടുത്തിയതായിരുന്നു ആ സംഭവം. രാഷ്ട്രീയ പാര്‍ട്ടികളോ മറ്റു രംഗത്തെ പ്രമുഖരോ അധികം ചര്‍ച്ച ചെയ്യപ്പെടാത്ത ഈ വിഷയത്തില്‍ പ്രശസ്ത സംഗീത സംവിധായകനായ ബിജിബാലിന്റെ ഫേസ്‌ബുക്ക് പോസ്റ്റ് വൈറലാകുന്നു.

ബിജിബാലിന്റെ ഫേസ്‌ബുക്ക് പോസ്റ്റിന്റെ പൂര്‍ണ്ണരൂപം:

"കോട്ടയത്ത് മാന്യൻമാരും മഹാൻമാരും എല്ലാം തികഞ്ഞവരുമായ ചിലരാൽ കയ്യും കാലും ബന്ധിക്കപ്പെട്ട് വായിൽ നിന്ന് നുരയും പതയും വന്ന് വെയിലത്ത് കിടന്ന് പിടഞ്ഞു മരിച്ച മഹാനല്ലാത്ത കൈലാസ് ജ്യോതി ബോറയ്ക്ക് ആദരാഞ്ജലി"

കോട്ടയം ചിങ്ങവനത്തായിരുന്നു സംഭവം നടന്നത്. ജോലിതേടിയാണ് കൈലാസ് രണ്ടുസുഹൃത്തുക്കള്‍ക്കൊപ്പം കോട്ടയത്തെത്തിയത്. കള്ളനെന്ന് ആരോപിച്ച് നാട്ടുകാര്‍ വെയിലത്ത് കെട്ടിയിട്ടതിനെ തുടര്‍ന്നാണ് അസം സ്വദേശിയായ കൈലാസ് മരണത്തിന് കീഴടങ്ങിയത്.

ഒരു സമ്പൂര്‍ണ വായനാനുഭവത്തിന് മലയാളം വെബ്‌ദുനിയ ആപ്പ് ഇവിടെ ഡൌണ്‍‌ലോഡ് ചെയ്യാം