കൊച്ചിയിൽ യുവനടിയെ തട്ടിക്കൊണ്ടു പോയ സംഭവത്തിൽ ആശങ്ക രേഖപ്പെടുത്തി താരസംഘടനയായ 'അമ്മ'. സംഭവവുമായി ബന്ധപ്പെട്ട് പ്രമുഖ നടനെ പ്രതിസ്ഥാനത്തുനിർത്തി പ്രചരിക്കുന്ന റിപ്പോർട്ടുകളെ തള്ളിയും അമ്മയുടെ പ്രസിഡന്റ് ഇന്നസെന്റ്, ജനറൽ സെക്രട്ടറി മമ്മൂട്ടി എന്നിവർ സംയുക്തമായി പുറത്തിറക്കിയ പ്രസ്താവന വ്യക്തമാക്കുന്നു.

ഞങ്ങളുടെ അംഗമായ മറ്റൊരു അഭിനേതാവിനു നേരെ എത്രയും നിന്ദ്യമായ വ്യക്തിഹത്യയും മാധ്യമവിചാരണയുമാണ് ഇപ്പോൾ നടന്നുകൊണ്ടിരിക്കുന്നത്. അഭ്യൂഹങ്ങളുടെയും കെട്ടിച്ചമച്ച ആരോപണങ്ങളുടെയും അടിസ്ഥാനത്തിലാണ് ഇങ്ങനെയൊരു അക്രമം ഇപ്പോൾ അരങ്ങേറുന്നത്. ഇത് വളരെ ദുഖ:കരമായ കാഴ്ചയാണെന്നും പ്രസ്താവനയിൽ പറയുന്നു.

യഥാർഥ കുറ്റവാളികൾ പിടിയിലാവുകയും സംഭവങ്ങളുടെ സത്യാവസ്ഥ പുറത്തുവരികയും ചെയ്യുമ്പോൾ, കെട്ടുകഥകളിൽ അഭിരമിച്ചവർ ഈ നാടിനു മുൻപിൽ തലതാഴ്ത്തേണ്ടിവരും എന്നു ഞങ്ങൾക്കു തീർച്ചയുണ്ടെന്നും പ്രസ്താവനയിലുണ്ട്.