വീട്ടമ്മയെ പീഡിപ്പിച്ചുവെന്ന കേസിൽ അറസ്റ്റിലായ കോവളം എംഎൽഎ എം വിൻസന്റിനെ കെപിസിസി സെക്രട്ടറി സ്ഥാനം ഉൾപ്പെടെയുള്ള പാർട്ടി പദവികളില്‍ നിന്നും തത്കാലത്തേക്ക് നീക്കിയതായി കെപിസിസി അധ്യക്ഷന്‍ എം.എം ഹസന്‍. കുറ്റവിമുക്തനാകും വരെയാണ് ഈ മാറ്റിനിര്‍ത്തല്‍. വീട്ടമ്മ നല്‍കിയ പരാതിക്കൊപ്പം ഇതിന്റെ പിന്നിലെ ഗൂഢാലോചനയും അന്വേഷിക്കണമെന്നും ഹസന്‍ പറഞ്ഞു.

അതേസമയം, എംഎൽഎ സ്ഥാനം വിൻസന്റ് രാജിവയ്ക്കില്ല. സ്ത്രീ നല്‍കിയ മൊഴി സ്വാധീനത്തിന്റെ അടിസ്ഥാനത്തിലുളളതാണെന്ന സംശയമാണ് തങ്ങള്‍ക്കെല്ലാവര്‍ക്കുമുള്ളത്. ഉന്നതമായ ജനാധിപത്യ മര്യാദ പാലിച്ചുകൊണ്ടാണ് കോണ്‍ഗ്രസ് അദ്ദേഹത്തെ മാറ്റിനിര്‍ത്തുന്നത്. കോടതി അദ്ദേഹത്തെ കുറ്റക്കാരനാണെന്ന് കണ്ടെത്തിയാല്‍ അന്നേരം രാജിയെക്കുറിച്ച് ആലോചിക്കാമെന്നും ഹസ്സന്‍ കൂട്ടിച്ചേര്‍ത്തു.