അഭിറാം മനോഹർ|
Last Modified ചൊവ്വ, 16 മെയ് 2023 (19:41 IST)
ഐപിഎല്ലില്‍ ഗ്രൂപ്പ് ഘട്ടത്തില്‍ പുറത്താകുമെന്ന ഭീഷണി നേരിടുകയാണ് സഞ്ജു സാംസണിന്റെ നേതൃത്വത്തിലുള്ള രാജസ്ഥാന് റോയല്‍സ്. ഇനി ശേഷിക്കുന്ന ഒരു ഗ്രൂപ്പ് മത്സരത്തില്‍ വിജയിച്ചാലും മറ്റ് ടീമുകളുടെ ജയപരാജയങ്ങള്‍ കൂടി അനുകൂലമാകുമെങ്കില്‍ മാത്രമെ രാജസ്ഥാന് പ്ലേ ഓഫിലെത്താന്‍ സാധിക്കു. ഈ ഘട്ടത്തില്‍ സഞ്ജു സാംസണിനെ അടുത്ത സീസണിലെങ്കിലും ക്യാപ്റ്റന്‍ സ്ഥാനത്ത് നിന്നും മാറ്റണമെന്ന് ആവശ്യപ്പെട്ട് രംഗത്തെത്തിയിരിക്കുകയാണ് രാജസ്ഥാന് ആരാധകര്‍.
സീസണില്‍ 200 റണ്‍സിനപ്പുറം 2 തവണ സ്‌കോര്‍ ചെയ്തിട്ടും ആ മത്സരങ്ങളിലൊന്നും തന്നെ ആ സ്‌കോര്‍ പ്രതിരോധിക്കാന്‍ സഞ്ജുവിനായിരുന്നില്ല. ടീമിന്റെ പ്ലേ ഓഫ് സാധ്യതകള്‍ തന്നെ അവസാനിച്ച സാഹചര്യത്തില്‍ സഞ്ജുവിന് പകരം ജോസ് ബട്ട്‌ലറെ ടീം നായകനാക്കണമെന്നാണ് ഒരു വിഭാഗം ആരാധകര്‍ ആവശ്യപ്പെടുന്നത്. ഇംഗ്ലണ്ടിന് ടി20 ലോകകപ്പ് ചാമ്പ്യന്മാരാക്കിയ ബട്ട്‌ലര്‍ക്ക് രാജസ്ഥാനെയും കിരീടത്തിലേക്ക് നയിക്കാനാകുമെന്ന് ആരാധകര്‍ പറയുന്നു.
