Last Updated:
തിങ്കള്‍, 17 നവം‌ബര്‍ 2014 (15:33 IST)
നിരുപമ രാജീവ് എന്ന കഥാപാത്രത്തിലൂടെ മലയാളത്തിന് ഏറ്റവും പ്രതിഭാധനയായ ഒരു നടിയെ തിരിച്ചുകിട്ടി. മഞ്ജു വാര്യര്‍ വീണ്ടും മലയാള സിനിമ ഭരിക്കാന്‍ തുടങ്ങി. സമാനമായ രീതിയില്‍ ജ്യോതികയും തിരിച്ചെത്തുന്നു. 'ഹൌ ഓള്‍ഡ് ആര്‍ യു' എന്ന സിനിമയുടെ തമിഴ് റീമേക്ക് തിങ്കളാഴ്ച ചിത്രീകരണം ആരംഭിച്ചു.
നിരുപമയായി
ജ്യോതിക ക്യാമറയ്ക്ക് മുമ്പില്‍ നിന്നത് ഡല്‍ഹിയിലെ ലൊക്കേഷനിലാണ്. നിരുപമ ഇന്ത്യന്‍ പ്രസിഡന്‍റിനെ സന്ദര്‍ശിക്കുന്നതും മറ്റുമാണ് ഡല്‍ഹി ഷെഡ്യൂളില്‍ ചിത്രീകരിക്കുന്നത്. റോഷന്‍ ആന്‍ഡ്രൂസ് തന്നെ സംവിധാനം ചെയ്യുന്ന ഈ സിനിമയ്ക്ക് പേര് നിശ്ചയിച്ചിട്ടില്ല.
റഹ്‌മാനാണ് ചിത്രത്തിലെ നായകന്‍. മലയാളത്തില്‍ കുഞ്ചാക്കോ ബോബന്‍ അനശ്വരമാക്കിയ കഥാപാത്രത്തെയാണ് തമിഴില്‍ റഹ്‌മാന്‍ അവതരിപ്പിക്കുന്നത്.
2ഡി എന്‍റര്‍‌ടെയ്ന്‍‌മെന്‍റിന്‍റെ ബാനറില്‍ നടന്‍ സൂര്യയാണ് ഈ ചിത്രം നിര്‍മ്മിക്കുന്നത്. രണ്ടുമാസത്തിനുള്ളില്‍ ചിത്രീകരണം പൂര്‍ത്തിയാകും.
